Для стварэння мадэлі
па сапраўднаму ўстойлівага развіцця неабходна тры вялікія пераўтварэнні: новая энергетычная
сістэма здольная паменшыць выраб дыяксіду вугляроду, больш устойлівая сельская гаспадарка
і выхаванне ў новых пакаленняў павагі да навакольнага асяродзя, лічыць амерыканскі
даследчык і старшыня “Earth Institute” Калумбійскага ўніверсітэта Джэфры Сачс. Навуковец
прыняў удзел у канферэнцыі пад назвай “Сям’я, барані стварэнне”, якая прайшла ў Ватыкане
29 сакавіка 2014 г. па ініцыятве Папскай рады па справах сям’і і асацыяцыі “Greenaccord”.
У
інтэрв’ю Ватыканскаму радыё Джэфры Сачс расказаў, што кліматычныя змены, якія адбываюцца
зараз з’яўляюцца “драматычнымі”. Яшчэ некалькі гадоў таму некаторымі дзяржавамі было
прынята рашэнне садзейнічаць паменьшэнню тэмпературы на планеце прынамсі на 2 градусы,
але сітуацыя не толькі не змянілася, а нават пагоршылася – сярэдняя тэмпература павелічылася
на 4 градусы, расказаў ён. Навуковец звярнуў увагу на шматлікія прыродныя катаклізмы,
які здараюцца ў розных частках свету і выказаў спадзяванне на пазітыўныя змены, у
сувязі з пасяджэннем ААН на тэму клімата ў снежні 2015 г.
Прысутны на ватыканскай
канферэнцыі генеральны сакратар Сінода Біскупаў кардынал Ларэнца Балдзісэры адзначыў,
што падчас форума ў першую чаргу падкрэслівалася важная роля сем’яў у навучанні павазе
да навакольнага асяродзя. Гэта яе функцыя будзе таксама абмяркоўвацца падчас наступнага
Сінода Біскупаў па праблемах сям’і, расказаў ён. Паводле пурпурата, існуе блізкая
сувязь паміж экалагічнымі праблемамі прыроды і крызісам экалогіі чалавека. Ён нагадаў,
што адным са шляхоў іх пераадолення з’яўляецца сціпласць і непрыняцце культуры спажывецтва.