Më 31 mars përkujtohet Shën Beniamini, martir. Në Argon të Persisë, Shën Beniamini,
diakon, nuk hoqi dorë nga predikimi i fjalës së Hyjit, prandaj, nën mbretërimin e
Vararanit V, pësoi martirizimin pas torturave të gjata, në vitin 420. Më 1 prill
përkujtohen Shën Agapa dhe Kionina, virgjëra dhe martire. Gjatë përndjekjeve të perandorit
Dioklecian, pasi nuk pranuan të hanin mishin kushtuar idhujve, i dorëzuan tek qeveritari
Dulcecius, i cili i dënoi me djegie, në vitin 304. Më 2 prill përkujtohet
Shën Françesku nga Paola. U lind në Paola (Kalabri) në vitin 1416. Hyri në urdhrin
françeskan, por pas një viti doli nga kuvendi dhe bëri një sërë shtegtimesh, për të
kërkuar, me anë të tyre, thirrjen e vet. Vendosi të bëhej heremit dhe u vendos në
Paola, në një tokë që ishte pronë e familjes. Shumë shpejt filluan të shkonin tek
ai njerëz që donin ta kishin si udhërrëfyes shpirtëror, prandaj iu desh të themelonte
disa hereme dhe kështu lindi kongregata heremite paolane, e quajtur edhe Urdhri i
të Vegjëve. Urdhri u miratua shpejt, falë famës së Françeskut si mrekullibërës. Mrekullive
të tij u shkoi zëri deri në Francë, në oborrin e Luigjit XI, që ishte i sëmurë. Luigji
i kërkoi Papës Siksti IV t’ia dërgonte Françeskun tek kryet e shtratit. Shenjti iu
bind Papës, edhe pse iu desh të linte me dhimbje heremin për të hyrë në një oborr
mbretëror, por bindja i dha frytet e veta. Luigji nuk u shërua, por Françesku u bë
ndërmjetës për përmirësimin e marrëdhënieve të Francës me papatin. Vdiq në Tur të
Francës më 2 prill 1507. Më 3 prill përkujtohet Shën Siksti I, papë. Meshtar
romak, më 115, u zgjodh si pasardhës i Pjetrit me votat e të gjithë klerit të kryeqytetit
perandorak. Njëri ndër vendimet që mori ishte se kelkun dhe pajisjet e shenjta të
altarit mund t’i preknin vetëm meshtarët. Vdiq në vitin 125. Më 4 prill
përkujtohet Shën Isidori i Seviljes. I fundmi i Etërve Latinë, shkrimet e të cilit
qenë shumë të rëndësishme në Mesjetë, sidomos “Etimologjitë”, një përmbledhje e dobishme
e shkencave të lashta. Qe mbi të gjitha ipeshkëv i zellshëm dhe ndihmoi për ngritjen
kulturore dhe morale të klerit spanjoll. Vdiq më 4 prill 636. Më 5 prill
përkujtohet Shën Irena nga Selaniku, virgjër e martire. Nuk iu bind urdhrit të Dioklecianit
për dorëzimin e librave të shenjtë, prandaj Dulceciusi e dënoi me djegie në Selanik,
në vitin 304. Më 6 prill është e diel, festa e Zotit.