Leximi i parë (1 Sam 16,1.4.6-7.10-13) Zoti i tha Samuelit: “Deri kur do
ta qash Saulin pasi unë e flaka tej që të mos mbretërojë mbi Izrael? Mbushe bririn
tënd me vaj e eja të të çoj tek Isai betlehemas: sepse gjeta për vete mbretin ndër
bijtë e tij”. Samueli bëri siç i kishte urdhëruar Zoti dhe erdhi në Betlehem. Kur
hynë, Samueli e pa Eliabin e tha: “S’ka dyshim se para Zotit është i shuguruari i
tij”. Por Zoti i tha Samuelit:”Mos e shiko fytyrën e tij dhe lartësinë e shtatit të
tij, sepse e kam përjashtuar. Unë nuk gjykoj sipas pamjes së njerëzve: njeriu sheh
çka duket përjashta, kurse Zoti vëren zemrën”. Kështu Isai i solli shtatë djemtë
e vet para Samuelit dhe Samueli i tha Isait: “Prej këtyre Zoti nuk ka zgjedhur asnjërin”. Samueli
i tha përsëri Isait: “A janë vetëm këta bijtë e tu”? Ai iu përgjigj: “Kam edhe një,
më të voglin, është duke kullotur delet”. Samueli i tha Isait: “Ço e sille këtu! Nuk
do ta shtrojmë bukën derisa të vijë ai këtu”. Dërgoi pra, dhe e solli. Ishte kuqlosh,
i bukur e i hijshëm nga pamja. Zoti i tha: “Çohu e lyeje, sepse ky është”. Atëherë
Samueli e mori bririn dhe e shuguroi mes vëllezërve të tij. Shpirti i Zotit e pushtoi
Davidin prej asaj dite e më tutje. Samueli u ngrit e shkoi në Ramë.
Nga
Psalmi 23 (22) Ref. Zoti është bariu im, asgjë nuk më mungon Më pushon
kullotave të gjelbra, më prin në ujëra të qeta, shpirtin ma përtërin. Ai
më prin shtigjeve të drejta në saje të dashurisë së Emrit të vet.
Po edhe
në kalofsha nëpër luginën e hijes së vdekjes, s’trembem nga e keqja sepse ti
je me mua: thupra jote dhe kërraba për mua janë ngushëllim.
Ti ma shtron
tryezën përpara ndër sy të armiqve të mi, me vaj erëmirë kokën ma lyen, gotën
ma mbush plot e përplot.
Hiri dhe mirësia do të më përcjellin në të gjitha
ditët e jetës sime, do të banoj në shtëpinë e Zotit derisa të jem gjallë.
Leximi
i dytë (Ef 5, 8-14)
Po, dikur ishit errësirë, por tani jeni dritë në Zotërinë.
Jetoni porsi bij të dritës. Fryti i dritës është: mirësia, drejtësia, e vërteta -
vendosni të bëni çka i pëlqen Hyjit! Mos kini pjesë në veprat e pafrytshme të errësirës,
por përkundrazi, më mirë zbulojini! Sepse veprat që këta njerëz i bëjnë fshehtazi
është turp edhe të fliten! E çdo gjë që zbulohet, del në dritën e vet të vërtetë,
sepse çdo gjë që është e zbuluar, është dritë. Prandaj thotë: ‘Zgjohu ti që fle,ngrihu
nga të vdekurit, dhe do të të shndrisë Krishti!’
Ungjilli (Gjn 9,1-41)
Duke
kaluar rrugës pa një njeri të verbër, që kishte lindur i verbër. Nxënësit e tij e
pyetën: “Rabbi, kush mëkatoi, ky apo prindërit e tij që lindi i verbër?”. “Nuk mëkatoi
as ky as prindërit e tij - u përgjigj Jezusi - por ndodhi kështu që në të të dëftohen
veprat e Hyjit. Derisa të jetë ditë na duhet t’i kryejmë veprat e Atij që më dërgoi.
Po vjen nata, kur askush s’mund të punojë. Derisa të jem në botë, jam drita e botës.” Si
tha kështu, pështyu në dhe, bëri baltë me pështymë, ia leu sytë me baltë dhe i tha:
“Shko e lahu në banjën Siloam (që do të thotë; I dërguari)”. Ai shkoi, u la dhe, kur
po kthehej, shihte. Fqinjët e tij dhe ata, që më parë e kishin parë duke lypur,
thoshin: “Po a nuk është ky ai që rrinte e lypte?”. “Ai është” - thoshin disa. “Jo,
por është një që i përngjan atij - thoshin disa të tjerë. Ai vetë thoshte: “Unë jam”.
Atëherë i thanë: “Po si (atëherë) të erdhi drita e syve?” Ai u përgjigj: “Njeriu që
quhet Jezus, përzjeu baltë, m’i leu sytë dhe më tha: ‘Shko në Siloam dhe lahu!’ Shkova,
pra, u lava dhe pashë.” “Ku është ai?” - i thanë. “Nuk di” - u përgjigj. Farisenjtë
e pyesin të verbërin si u shërua. Atëherë e çuan atë, që përpara ishte i verbër,
te farisenjtë. Ajo ditë kishte qenë e shtunë, kur Jezusi përzjeu baltën dhe ia dha
dritën e syve. Edhe farisenjtë filluan prapë ta pyesin si e fitoi të pamit e syve.
Ky u përgjigj: “Më vuri baltë në sy, unë u lava - dhe, ja, tani shoh!” Atëherë disa
prej farisenjve thanë: “Ky njeri nuk është prej Hyjit, sepse nuk e mban të shtunën!”
Por disa të tjerë thoshin: “Një mëkatar si mund të bëjë këso shenjash?” Dhe u bë përçarje
ndër ta. Pastaj e pyetën prapë të verbërin: “E ti, çfarë thua për atë njeri që ta
dha të pamit e syve?” “Është profet” - iu përgjigj. Judenjtë nuk besuan se kishte
qenë vërtet i verbër dhe se iu shëruan sytë, derisa thirrën prindërit e atij që u
shërua, dhe i pyetën: “A është ky djali juaj, për të cilin pohoni se lindi i verbër?
E si sheh tani?” Atëherë prindërit e tij u përgjigjën: “E dimë se ky është djali
ynë dhe se lindi i verbër. Si sheh tani, nuk e dimë. As nuk dimë se kush ia shëroi
sytë. Pyetni atë: është njeri i rritur, ai do t’ju tregojë për vete.” Prindërit
e tij folën kështu, sepse i druanin judenjtë. E njëmend, judenjtë kishin marrë vendim
të përjashtohet nga sinagoga ai që Jezusin do ta dëshmonte për Mesi. Për këtë arsye
u përgjigjën prindërit e tij: ‘I rritur është, pyetni atë!’ Atëherë e thirrën për
së dyti atë që kishte qenë i verbër dhe i thanë: “Jepi lavdi Hyjit! Ne e dimë se ai
është njeri mëkatar!” “A është mëkatar - u përgjigj - s’e di; një gjë e di: kam qenë
i verbër e tani shoh!” Atëherë ata i thanë: “Çka të bëri? Si t’i shëroi sytë?”
“Tashti ju thashë ‑ u përgjigj ‑ e nuk më dëgjuat? Çka? Doni prapë të dëgjoni? A mos
doni të bëheni edhe ju nxënësit e tij?” Atëherë ata filluan ta fyejnë e i thoshin:
“Ti je nxënësi i tij! Ne jemi nxënësit e Moisiut! Ne e dimë se Hyji ka folur me Moisiun
e për këtë nuk dimë as prej nga është!” “Pikërisht kjo gjë është e çuditshme -
u përgjigj njeriu - ju s’dini as prej nga është, e mua më dha dritën e syve! E ne
e dimë fort mirë se Hyji nuk i dëgjon mëkatarët, por dëgjon atë që e nderon Hyjin
dhe e kryen vullnetin e tij! Që prej amshimit s’është dëgjuar se ndokush ia ka dhënë
të pamit e syve të verbërit që lindi i verbër! Po të mos ishte ky njeri prej Hyjit,
s’do të mund të bënte asgjë!” “Që kur linde, s’je tjetër veç mëkat - iu përgjigjën
- e ti po na mëson!?” Dhe e hodhën përjashta. Jezusi e mori vesh se e kishin qitur
jashtë. Kur e gjeti, i tha: “A beson ti në Birin e njeriut?” Ai iu përgjigj: “Po kush
është ai, Zotëri, që të besoj në Të?” “E pe - i tha Jezusi - Është ai që po flet me
ty!” Ai tha: “Besoj, o Zot!” dhe ra përmbys para tij. Jezusi i tha: “Erdha në këtë
botë të bëj gjyq: që të shohin ata që janë të verbër e të verbohen ata që shohin!” Disa
prej farisenjve që ishin me të i dëgjuan këto fjalë dhe thanë: “Vallë, a thua edhe
ne jemi të verbër?” Jezusi u përgjigj: “Po të ishit të verbër, s’do të kishit mëkat.
Porse ju thoni: ‘Shohim!’ prandaj mëkati juaj mbetet.”
Krishti, dritë
në errësirën tonë
Kur lind një fëmijë, përdoret një shprehje, që thotë:
“doli në dritë”. Ky kalim bën të mundur vijimësinë e jetës. Kur dikush vdes, thuhet
“u shua”. Është domethënëse që gjuha e përbashkët e njëjtëson jetën me dritën dhe
vdekjen me errësirën. Drita dhe errësira shprehin simbolikisht gjendjen njerëzore
me kundërshtitë e saj: jo vetëm jetë-vdekje, por edhe vërtetësi-gënjeshtër, drejtësi-padrejtësi.
Vetë ndërrimi kozmik i ditës me natën tregon rëndësinë themelore të marrëdhënies dritë-errësirë.
E mbështjellë me errësirë, bota e humb rëndësinë e vet, gjërat nuk kanë hir as ngjyrë,
njeriu është i verbër, lëndor, i mbërthyer nga ndjenja therëse e vetmisë, e bjerrjes,
e frikës. Vezullimi i parë e rizgjon jetën, gëzimin dhe shpresën.
Nga errësira
në Dritë
Në ungjillin e sotëm vihen përballë njëra-tjetrës drita dhe errësira.
Njeriu i prekur nga verbëria e pashërueshme, i mënjanuar nga shoqëria dhe feja është
personifikimi simbolik i gjendjes mëkatare në të cilën është njeriu i pandriçuar nga
Krishti. Vetëm takimi me Krishtin, Drita e botës, drita “që ndriçon çdo njeri” (Gjn
1,9) – e heq perden nga sytë, e ripërtërin njeriun, ia kthen tërë dinjitetin, e lejon
të pikasë shkëlqimin e gjërave dhe shijen e re të jetës. Tregimi ungjillor i njeriut
që “u lind i verbër” është interpretuar gjithmonë në perspektivën e pagëzimit. Pagëzimi
është pishina jonë e Siloesë, kalimi nga errësira në dritë, çasti i përndritjes. Që
në kohët apostolike i pagëzuari quhej i përndritur (shih Heb 6,4; 10,32), mbiemër
që shprehte gjendjen e tij të re. Të bashkohesh me Krishtin-Dritë do të thotë të bëhesh
i aftë të shohësh realitetin e Hyjit, misterin e njeriut dhe të historisë me sy të
rinj; do të thotë të marrësh mendësinë e fesë, duke përvetësuar si kriter vlerësimi
dhe vendimmarrjeje logjikën e Ungjillit. I pagëzuari hyn në zonën dritëplotë të Krishtit-Dritë,
që e bën “ta shohë historinë si Ai, ta gjykojë jetën si Ai, të zgjedhë e të dojë si
Ai, të shpresojë siç mëson Ai, të jetojë nëpërmjet Tij bashkësinë me Atin dhe me Shpirtin
e Shenjtë” (Përtëritja e katekezës, 38. Shih: Catechesi tradendae, 20). Ky synim nuk
përmbushet asnjëherë plotësisht. Mbeten gjithmonë zona të errëta, të padepërtueshme
nga drita. Shtresa e trashë e errësirës së historisë, ngjarjet dramatike në të cilat
përfshihet i krishteri, dëshira për mirëqenie mund ta rrëgjojnë dritën në një fitil
tymues. Aq më tepër kur feja sjell përplasjen me frymën dhe logjikën e botës.
Tregimi i njeriut që kishte lindur i verbër është domethënës në këtë drejtim: prindërit
kanë frikë përplasjen me pushtetarët, stepen nga frika e judenjve dhe e masave që
ata do të merrnin; por biri i tyre bëhet guximtar dhe provokues kundrejt bashkëbiseduesve
të tij të zymtë, të cilët, për shkak të mendjemadhësisë, shndërrohen mirëfilli në
të verbër.
“Jetoni si bij të dritës”
Të zgjedhur nga Hyji krejtësisht
falas, të pagëzuarit marrin shugurimin mbretëror të Shpirtit, që depërton tërë qenien
(leximi i parë) dhe jep përndritjen e fesë. Asambleja e shpreh në këtë mënyrë vetëdijen
e këtij realiteti: “Në misterin e mishërimit (Krishti) u bë udhëzuesi i njeriut, që
ecte në errësirë, për t’i prirë drejt dritës së madhe të fesë” (prefaci). “Dikur ishit
errësirë, tani jeni dritë në Zotin. Silluni, prandaj, si bijtë e dritës...” (leximi
i dytë). Ndryshimi i gjendjes mbart me vete detyrimin për të shfaqur me jetë risinë
që sjell pagëzimi. Vetë kremtimi eukaristik është përndritje e re, sepse është bashkim
jetik me Atë që është Drita: “shkova, u lava dhe tani shoh” (kthesa e kungimit). Të
jesh dritë në Zotin do të thotë të jesh edhe burim i dritës, të prodhosh ato fryte
që Pali i sheh “tek çdo mirësi, drejtësi dhe vërtetësi” (leximi i dytë)
Si
duhet të jetë prania e krishterë në botë?
Në një botë në
të cilën dhuna, konflikti, rivaliteti dhe gënjeshtra duket se kanë epërsinë, prania
e të krishterëve përbën forcën e shenjës së kundërshtimit, e cila i padit veprat vdekjeprurëse.
Mirësia është jeta me dashuri, mikpritje, gatishmëri dhe falje. Drejtësia është ndershmëri,
sjellje e drejtë, pranim i vullnetit të Zotit. E vërteta është pranim i Ungjillit
dhe i kritereve të tij, mundësia për të qenë të lirë nga gënjeshtra e mëkatit dhe
nga skllavëria. Errësira është e paaftë të “prodhojë”, mundet vetëm të “veprojë”,
por vepra e saj është shterpë. A janë me të vërtetë familja dhe bashkësia e krishterë
vendet ku shfaqet drita, ku edukohemi në fe dhe në vlerat e saj? Nëse Fjala e Zotit
na padit, ajo na ndihmon edhe për t’u bërë sërish të vetëdijshëm për çfarë jemi dhe
çfarë duhet të jemi.
Krishti, rruga për tek drita, e vërteta dhe jeta (Nga
“Trajtesat përreth Gjonit” të Shën Agostinit, ipeshkëv)
Zoti, në mënyrë të
përmbledhur, ka thënë: “Unë jam drita e botës; kush vjen pas meje, nuk do të ecë në
errësirë, por do të ketë dritën e jetës” (Gj 8,12), dhe me këto fjalë urdhëron një
gjë dhe premton një tjetër. Të përpiqemi, pra, të zbatojmë çfarë na urdhëron, sepse
përndryshe do të ishim të paturp dhe të pafytyrë nëse di t’i kërkonim çfarë na ka
premtuar, pa përmendur se, kur të na gjykojë, do të dëgjojmë këtë qortim: A ke zbatuar
çfarë të kam urdhëruar, që të kërkosh tani çfarë të kam premtuar? Çfarë ke urdhëruar,
atëherë, o Zot Hyji ynë? Do të të përgjigjet: që ti të vish pas meje. Ka urdhëruar
një këshillë jete. Të cilës jetë, përveçse asaj për të cilën është thënë: “Në ty është
burimi i jetës”? (Ps 35,10). Prandaj, të vihemi në punë menjëherë, ta ndjekim Zotin:
t’i këpusim vargonjtë që na pengojnë ta ndjekim. Por, kush mund t’i thyejë këta vargonj,
nëse nuk na ndihmon ai për të cilin qe thënë: “I këpute vargonjtë e mi”? (Ps 115,16).
Për të një tjetër Psalm thotë: “Zoti i liron të burgosurit, Zoti e ngre të rrëzuarin”
(Ps 145,7.8). Çfarë ndjekin ata që janë liruar dhe ringritur, përveçse dritën, për
të cilën dëgjojnë t’u thuhet: “Unë jam drita e botës; kush vjen pas meje nuk ecën
në errësirë”? (Gj 8,12). Po, sepse Zoti ua hap sytë të verbërve. O vëllezër, tani
sytë tanë janë mjekuar me vajin e fesë. Në fillim, në të vërtetë, përzjeu pështymën
e vet me dheun, për të lyer atë që kishte lindur i verbër. Edhe ne kemi lindur të
verbër prej Adamit dhe kemi nevojë që ai të na ndriçojë. Ai përzjeu pështymën me dheun:
“Fjala u bë njeri dhe erdhi për të banuar mes nesh” (Gj 1,14). Përzjeu pështymën me
dheun, sepse kështu kishte qenë parashikuar: “E vërteta do të mbijë nga dheu” (Ps
84,12) dhe ai thotë: “Unë jam udha, e vërteta dhe jeta” (Gj 14,6). Do ta shijojmë
të vërtetën, kur ta shohim ballë për ballë, sepse edhe kjo gjë na është premtuar.
Kush do të guxonte të shpresonte diçka të cilën Hyji nuk do të ishte denjuar ta premtonte
apo ta jepte? Do ta shohim ballë për ballë. Apostulli thotë: Tani njohim në mënyrë
të paplotë; tani shohim si në pasqyrë, vagëllimthi; por atëherë do të shohim ballë
për ballë (shih 1 Kor, 13,12). Dhe Apostulli Gjon, në letrën e tij, shton: “Fort të
dashur, ne që tani jemi bij të Hyjit, por çfarë do të jemi nuk është zbuluar ende.
Megjithatë, e dimë se, kur ai të shfaqet, ne do të jemi të ngjashëm me të, sepse do
ta shohim ashtu siç është” (1 Gj 3,2). Ky është premtimi i madh. Nëse e do, shko
pas tij. Ti thua: e dua, në cilën udhë duhet ta ndjek? Nëse Zoti Hyji yt do të të
kishte thënë: unë jam e vërteta dhe jeta, ti, duke dëshiruar të vërtetën dhe duke
u djegur për jetë, do ta kërkoje me siguri udhën për të arritur tek njëra dhe tek
tjetra. Do të thoshe me vete: gjë e madhe është e vërteta, e mirë e madhe është jeta.
Ah, sikur shpirti im ta gjente rrugën për t’i arritur! Ti po kërkon udhën? Dëgjoje
Zotin, që të thotë pikë së pari: Unë jam udha. Para se të të thotë ku duhet të shkosh,
të ka treguar nga duhet të kalosh: “Unë jam” – thotë “udha”! Udha për ku? Për tek
e vërteta dhe jeta. Në fillim të tregon udhën që duhet të marrësh, pastaj pikëmbërritjen.
“Unë jam udha, unë jam e vërteta, unë jam jeta”. Kur ishte pranë Atit ishte e vërteta
dhe jeta. Kur u vesh me mishin tonë, u bë udha. Nuk po të thuhet: duhet të lodhesh
për të gjetur udhën që të çon tek e vërteta dhe tek jeta. Nuk po të thuhet kështu.
Përtac, çohu! Vetë udha erdhi tek ti dhe të ka zgjuar nga gjumi, nëse me të vërtetë
të ka zgjuar. Çohu dhe ec! Ndoshta ti përpiqesh të ecësh, por nuk mundesh, sepse
të dhembin këmbët. Pse të dhembin? Sepse u është dashur të përshkojnë shtigjet e ashpra
ku i kanë detyruar të ecin egoizmat e tu? Por, Fjala e Hyjit ka shëruar edhe të çalët.