Ftesa e Papës rrëfyesve: mos e harroni shpirtin e mëshirës së Zotit
Zemra e meshtarit, ëshë zemër, që di të preket thellë, e jo për sentimentalizëm, as
sepse është shumë e ndjeshme. Preket, për shkak të “pafundësisë të mëshirës së Zotit”.
Kështu u foli Papa Françesku pjesëmarrësve në kursin e Pendestarisë Apostolike, Gjykatë
kompetente kryesisht për çështjet sakramentore, si dhe për ndjesët.
“Jeni
të thirrur për të qenë njerëz të Shpirtit Shenjt. Ai është protagonist i misterit
të Pajtimit me Zotin”. Papa Françesku nënvizoi, kështu, rëndësinë e formimit të meshtarëve,
që të jenë rrëfyes të mirë, të vetëdijshëm për rëndësinë e këtij shërbimi: “Rrëfyesi
i pret pendestarët jo si të ishte ndonjë gjykatës, e as thjesht si mik, por me dashurinë
e Zotit, dashuri e Atit, që e shikon të birin duke u kthyer e shkon ta takojë, të
bariut, që e gjen rishtas delen e humbur”. Papa Françesku kujtoi se rrëfyesit
duhet të jenë dëshmitarë e kumtarë të Ngjalljes së Krishtit, duke pohuar, në vijim,
se kjo dëshmi lexohet në fytyrën, dëgjohet në zërin e meshtarit, që mbarështon me
fe e me “ vajim”, Sakramentin e Pajtimit. “Zemra e meshtarit është zemër,
që di të preket, jo për sentimetalizëm, as thjesht, pse tepër e ndjeshme, por për
‘shpirtin e mëshirës së Zotit”. Papa Françesku e quan këtë “Sakrament i
mëshirës’. Prej këndej: “Nëse është e vërtetë që tradita na flet për rolin
e dyfishtë të rrëfyesit, si mjek e si gjykatës, nuk duhet harruar kurrë se, si mjek,
duhet të shërojë, si gjykatës, të shfajsojë”. Falja, që jep Sakramenti,
është jetë e re, dhuratë e Zotit të Ngjallur për njeriun, përmes Shpirtit të Tij,
pohoi Ati i Shenjtë, duke shtuar se detyra e meshtarëve është t’ia dhurojnë bujarisht
vëllezërve. Një meshtar, që nuk ka kujdes për këtë pjesë të shërbimit të tij, si në
sasinë e kohës, që i kushton, ashtu edhe në cilësinë shpirtërore, është si bariu,
që nuk ka kujdes për delet e humbura; si ati, që e harron birin larg plangut e pushon
s’e prituri. E pastaj nënvizoi: “Mëshira është zemra e Ungjillit! Është lajmi
i mirë se Zoti na do, se e do gjithnjë njeriun mëkatar, e me këtë dashuri, e tërheq
nga vetja dhe e fton të pendohet”. Të mos harrojmë, kujtoi Françesku, se
besimtarët nuk e kanë gjithnjë aq të lehtë të gjunjëzohen në rrëfyestore për Sakramentin
e Rrëfimit, si për arsye praktike, ashtu edhe të natyrshme, nga që është e vështirë
të shkosh e t’ia rrëfesh tjetrit mëkatet e tua. Prej këndej, porosia e Papës: “Duhet
të punojmë shumë me vetveten, me humanitetin tonë, për të mos e penguar kurrë, por
përkundrazi, për ta ndihmuar gjithnjë njeriun, që ta pranojë mëshirën e faljen: “Shpesh
herë ndodh që ndokush vjen e thotë: ‘Nuk rrëfehem prej vitesh. E kam lënë rrëfimin,
sepse gjeta një meshtar, që më tha këtë e atë. E këtu ndjehet paurtia, mungesa e dashurisë
baritore. Që e largon njeriun nga rrëfystorja, për shkak të përvojës së pakëndshme
në rrëfim. Nëse do të silleshim me kujdesin e atit, që vjen nga mirësia e Zotit, një
gjë e tillë nuk do të ndodhte kurrë”. Françesku është i sigurt se Zoti
na fal: “Rrëfimi nuk është gjykatë, që të dënon, por përvojë faljeje e mëshire”.Një
thirrje konkrete, në përfundim: “Në çdo famulli, besimtarët duhet ta dinë kur mund
të gjejnë meshtarë, të gatshëm për të rrëfyer”.