Նախագահ Սարգսեան եւ Գարեգին Բ. Կաթողիկոս Արամ Ա. Կաթողիկոսին հեռաձայնելով կը յայտնեն
իրենց մտահոգութիւնն ու զօրակցութիւնը Քեսապի հայութեան գծով։
Երկուշաբթի 24 մարտի առաւօտ` Մեծի Տանն Կիլիկիոյ Արամ Ա. կաթողիկոս հեռաձայն ստացաւ
Հայաստանի Հանրապետութեան վսեմաշուք Նախագահ՝ Սերժ Սարգսեանի կողմէ: Նախագահը ուզեց Վեհափառ
Հայրապետէն իմանալ Քեսապէն ներս ստեղծուած կացութեան մասին: Վեհափառ Հայրապետը մանրամասնօրէն
զեկուցեց Պրն. նախագահին ուրբաթ եւ շաբաթ օրեր յաջորդաբար թրքական սահմաններէն դէպի Քեսապ
զինեալներու կազմակերպ թափանցումը՝ Թուրքիայէն եկող սաստիկ ռմբակոծումներու տարափին տակ:
Ապա իր կոչը ուղղուած Սուրիոյ պետութեան՝ պաշտպանելու Քեսապի անզէն հայ ժողովուրդը:Վեհափառ Հայրապետը նաեւ յայտնեց որ փաստօրէն Քեսապ պարպուած է իր հայութենէն եւ գաղթականները ապաստան հաստատած են Լաթաքիոյ եկեղեցւոյ ու դպրոցին մէջ: Պրն նախագահը իր պատրաստակամութիւնը յայտնեց ամէն գնով օգտակար հանդիսանալու մեր ժողովուրդի զաւակներուն եւ խոստացաւ առաջին հերթին այս հարցը արծարծել դիւանագիտական ու քաղաքական շրջանակներէն ներս:
Նոյն օը երեկոյեան Վեհափառ Հայրապետին հեռաձայնեց Գարեգին Բ. Ամենայն Հայոց Կաթողիկոսը եւ իր մտահոգութիւնը յայտնեց Քեսապէն ներս տիրող կացութեան գծով: Արամ Ա. կաթողիկոս պարզեց շրջանէն ներս տեղի ունեցած դէպքերը: Գարեգին Բ. Կաթողիկոս նաեւ իր պատրաստակամութիւնը յայտնեց օգտակար հանդիսանալու շրջանի հայութեան: Երկու Վեհափառ Հայրապետները որոշեցին մնայուն կապի մէջ ըլլալ:
| All the contents on this site are copyrighted ©. |