Սուրիոյ արտաքին գործոց նախարարութեան աղբիւր մը յայտարարեց, որ անցնող ուրբաթ եւ շաբաթ
օրերուն ընթացքին թրքական կառավարութիւնը սահմանային Քեսապի շրջանին մէջ աննախադէպ զինուորական
յարձակում իրականացուցած է Սուրիոյ հողային ամբողջականութիւնը հարուածելով` նշելով, որ
այս յարձակումը կատարուեցաւ հրետանային ռմբակոծութեամբ` թրքական հողատարածքներէն դէպի
սուրիական տարածք զինեալ խմբաւորումներուն մուտքը ապահովելու համար: Նշենք, որ ընդդիմադիր
կողմը յարձակման գործողութիւնը անուանած է «Անֆալի ճակատամարտ», որուն վերջնական թիրախը
Լաթաքիան կը նկատէ: Պաշտօնական տուեալները կը հաղորդեն, որ շաբաթ օր սուրիական բանակի
ուժերու միաւորներ մեծ հարուած հասցուցած են սահմանէն ներթափանցած զինեալ խմբաւորումներուն:
Տարբեր աղբիւրներ կը նշեն, որ բախումներու հետեւանքով կիրակի օր զինեալները մտած են Քեսապ
եւ շրջակայ գիւղերը` հասնելով մինչեւ Էքիզոլուխ: Նշենք որ շաբաթ օրուան երկրորդ կիսուն
բնակիչները լքեցին Քեսապն ու գիւղերը, սակայն մօտ 30 տարեցներ տակաւին կը մնան այնտեղ:
Քեսապէն Լաթաքիա ապաստան գտած ցանկագրուած հայ ընտանիքները կը հաշուեն մօտ 500 ընտանիք
եւ կը ստանան համապատասխան օգնութիւն` Կարմիր մահիկի, Լաթաքիոյ եւ Քեսապի Շտապ օգնութեան
մարմիններուն եւ միութիւններուն համադրուած աշխատանքին իբրեւ արդիւնք: Սուրիական բանակի
միաւորները ազգային ինքնապաշտպանական ջոկատներուն աջակցութեամբ Քեսապի եւ այլ արուարձաններու
շրջաններուն մէջ կը պաշարեն ընդդիմադիր զինեալները: Բուռն բախումները կը շարունակուին,
ուր մարտերը կ՛ընթանան յարձակում-նահանջ գործողութիւններ իրականացնելով եւ երկու կողմերէն
ալ կորուստներ պատճառելով: Թրքական հակաօդային ուժերը երէկ վար առին սուրիական ռմբաձիգ
մը, որ կը հարուածէր Քեսապի շրջանին մէջ ընդդիմադիր զինեալներու դիրքերը: Սուրիական բանակը
հակադարձեց ռմբակոծելով Ելտաղըի մէջ զինեալներու կեդրոնները: Ըստ թրքական կողմին, սուրիական
օդանաւը Թուրքիոյ օդային տարածքը բռնաբարած էր: Թուրքիա զգուշացուց Սուրիան, որ բուռն
կերպով պիտի հակադարձէ, եթէ իր օդային տարածքը բռնաբարուի: Թուրքիոյ վարչապետ Ռեճեփ
Թայիփ Էրտողան շնորհաւորեց թրքական օդուժը սուրիական ռմբաձիգը վար առնելուն համար` նշելով.
«Այսուհետեւ Թուրքիոյ հակադարձութիւնը բուռն պիտի ըլլայ»: Ան ըսաւ. «Էֆ-16» տիպի մեր
օդանաւերը վար առին սուրիական օդանաւ մը, որ թրքական օդային տարածքը խզեց»: Թուրքիոյ
նախագահ Ապտիւլլա Կիւլ իր կարգին այս առիթով շնորհաւորեց Թուրքիոյ բանակի սպայակոյտի
պետը` նշելով. «Այս քայլը իր սահմանները պաշտպանելու Թուրքիոյ վճռակամութիւնը ցոյց կու
տայ»: Սուրիոյ պաշտպանութեան նախարարութիւնը յայտնեց, որ թրքական հակաօդային պաշտպանութեան
ուժերը կրակած են օդանաւին ուղղութեամբ ճիշդ այն պահուն, երբ մտադիր էր յարձակում գործել
Լաթաքիոյ նահանգին մէջ ընդդիմադիր զինեալներու դէմ: Նախարարութիւնը տեղի ունեցածը «նախայարձակումի
անթաքոյց դրսեւորում» նկատեց: Մինչ այդ, «Մայատին» հաղորդեց, որ Քեսապի մէջ բախումները
շարունակուած են: Սուրիական բանակը հակայարձակում մը գործած է սահմանային Նապահ Միր շրջանին
դէմ: Սպաննուած են շարք մը ընդդիմադիր զինեալներ, որոնց շարքին Ժապհաթ Նուսրայէն Ապտելմուհսեն
Շարեխ, որ ծանօթ է «Ուասիքուլլահ» անունով, ինչպէս նաեւ Օմար Մուխթար ջոկատի ղեկավար
Մոհամետ Քաֆի: Թրքական «Սոլհապեր» օրաթերթը հաղորդեց, որ Քեսապի դէմ յարձակում գործած
«ահաբեկչական խմբաւորումները» իրենց յարձակումը շղթայազերծած են Թուրքիայէն: Թրքական
«Կրանտ Աֆերզ» օրաթերթը նշեց, որ զինեալները թրքական օդային պաշտպանութիւն կը ստանան`
աւելցնելով, որ «Թուրքիա եւ Քաթար քաղաքական իրենց դիրքը փոխելէ առաջ վերջին պատգամները
կ՛ուզեն փոխանցել»: Թրքական «Կրանտ Սթրաթեճի» թերթը իր կարգին կը նշէ, որ հիւսիսային
Սուրիոյ դէմ յարձակումին նպատակը Եապրուտի, Քալամունի եւ Քալաաթ Հոսնի մէջ իր արձանագրած
յաջողութիւններէն ետք սուրիական բանակին թափը կտրելն է: