Papa Françesku: Zoti na i fal gabimet, jo siguritë tona
Nuk na shpëton siguria, që buron nga respektimi i urdhërimeve të Tënzot, por përvujtëria,
e cila na kujton se kemi gjithnjë nevojë për Zotin, i vetmi që mund t’i shërojë sëmundjet
tona. Këtë theksoi sot Papa gjatë Meshës, kremtuar në kapelën e Shtëpisë së Shën Martës.
“Asnjë profet
nuk mirëpritet në atdheun e vet”: homelia e Papës u nis nga këto fjalë të Jezusit
drejtuar bashkëvendasve, banorëve të Nazaretit, në praninë e të cilëve nuk mundi të
bëjë mrekulli, sepse nuk kishin besim. Jezusi kujton dy episode biblike: mrekullinë
e shërimit të Naamanit Sirian nga gërbula në kohën e Elizeut profet dhe takimin e
profetit Elia me vejushën e Sareptës së Sidonit, që shpëtoi gjallë në kohën kur bënte
kërdi zija e bukës. Të gërbulurit e vejushat, shpjegoi Papa, në atë kohë ishin njerëz
të përjashtuar nga radhët e shoqërisë. E pra, pikërisht këta dy të përjashtuar, të
përbuzur, të papërfillur, shpëtuan, duke mikpritur profetët. Ndërsa nazarenasit nuk
duan ta pranojnë Jezusin, sepse ishin tepër të sigurt në fenë e tyre, tepër të sigurt
në zbatimin e Urdhërimeve, aq sa nuk e ndjenin nevojën për asnjë shpëtim tjetër: “Është
drama e respektimit të Urdhërimeve, pa fe: unë shpëtoj vetvetiu, sepse shkoj në sinagogë
çdo të shtunë, përpiqem t’u bindem Urdhërimeve; e të mos guxojë kush të vijë e të
më thotë se ishin më të mirë nga unë ai i gërbuluri e ajo vejanja! Ata ishin të përjashtuar
nga radhët e njerëzisë! E Jezusi na thotë: ‘ Pa shiko, nëse ty nuk të pëlqen të rrish
mënjanë, nëse nuk përulesh, mos prit shpëtim’. Kjo është përvujtëria, udha e përvujtërisë:
ta ndjejmë veten shumë të përulur, sepse kemi nevojë për mëshirën e Zotit. Vetëm
Ai na shpëton, jo respektimi i Urdhërimeve. E pikërisht kjo nuk u pëlqeu nazarenasve.
Prandaj donin ta vrisnin”. Edhe Naamani, komentoi Papa, në fillim u tërbua,
sepse iu duk poshtëruese ftesa e Elizeut për t’u zhytur shtatë herë në ujërat e Jordanit,
nëse donte të shërohej nga gërbula. Zoti i kërkoi të bënte një gjest të përvuajtur,
si të ishte fëmijë. I kërkoi të bëhej qesharak. E ai iku tërë inat. Por më pas, i
bindur nga shërbëtorët e vet, u kthye prap e bëri atë, që e kishte këshilluar profeti.
Ky veprim i përvuajtur e shpëtoi. E ky është edhe mesazhi i sotëm, në këtë javë të
tretë të Krezhmëve, pohoi Papa. Nëse duam të shpëtojmë, duhet të zgjedhim rrugën e
përuljes: “Maria, në Këngën e vet, nuk shpreh kënaqësinë se Zoti e pa virgjërinë
e saj, mirësinë e ëmbëlsinë e saj, shumë e shumë virtyte të tjera, që kishte, jo!
Por sepse Zoti e pa përultësinë e shërbëtores së vet, vogëlsinë e saj, përvujtërinë.
Këtë shikon Zoti. E duhet ta mësojmë këtë dije, të përvujtërisë, që Zoti të vijë e
të na gjejë. Nuk na gjen në qendër të sigurive tona, jo, jo! Atje nuk shkon Zoti.
Na gjen në përvujtëri, në mëkatet tona, në gabimet, në nevojat për t’u shëruar shpirtërisht,
për t’u shëlbuar; atje vjen e na gjen Zoti”. E kjo, pohoi Papa, është udha
e përvujtërisë: “Përvujtëria e krishterë nuk është virtyt, që duhet vënë
në dukje. Nuk është për t’u thënë: ‘Po, unë jam shërbëtor, nuk vlej fare’ e ta fshehësh
mburrjen brenda këtyre fjalëve, jo, jo! Përvujtëri e krishterë është të thuash të
vërtetën: ‘Jam mëkatar! Jam mëkatare’. Të thuash të vërtetën; është kjo e vërteta
jonë. Por është edhe tjetra: Zoti na shpëton. Po na shpëton atje, ku jemi të përvuajtur;
nuk na shpëton në sigurinë tonë. T’i lypim hirin të na japë urtinë e përuljes, hirin
e përvujtërisë, për të marrë shëlbimin e Zotit”.