Անցեալ 5 դեկտեմբեր 2013-ին յայտարարուած ''Անչափահասներու պաշտպանութեան քահանայապետական
յանձնախումբը'', ստեղծուեցաւ Ֆրանչիսկոս Քահանայապետի կամքով։ Յանձնախումբին անդամներն
են, Քաթրին Պոնէ` ֆրանսայէն, Մարի Քոլլինզ` Իրլանտայէն, Շէյլա Հոլլինզ` մեծն Պրիտանիայէն,
Կարտինալ Սին Փաթրիք Օ Մալլէյ` Միացեալ Նահանգներէն, Քլաուտիօ Բաբալէ` Իտալիայէն, Հաննա
Սուչոքա` Լեհաստանէն, Հայր Ումպերթօ Միկել Եանէզ` Արժանթինէն եւ հայր Հանզ Զոլլնէր` Գերմանիայէն։
Վերոյիշեալ անդամներուն պարտականութիւնն է սերտել յանձնախումբի սահմանադրութիւնը։
Յառաջիկային յանձնախումբին մաս պիտի կազմեն այլ անդամներ աշխարհի զանազան վայրերէն։ Նոր
յանձնախումբի մասին արտայայտուելով Վատիկանի բանբեր` Հայր Ֆետերիքօ Լոմպարտին յայտնեց
թէ ըլլայ Յովհաննէս Պօղոս Բ, ըլլայ Պենետիկտոս ԺԶ քահանայապետները, միշտ յանձնառու եղած
են մանուկներու պաշտպանութեան հարցով եւ Ֆրանչիսկոս Պապը, Կարտինալներուն հետ խորհրդակցելէ
ետք, որոշած է ստեղծել սոյն յանձնախումբը, նկատի ունենալով թէ Եկեղեցւոյ առաջնահերթ մտահոգութիւններէն
մին է անչափահասներու պաշտպանութիւնը եւ այս ուղղութեամբ է որ յանձնախումբի անդամ անուանած
է, զանազան երկիրներէ այս հարցով զբաղող հեղինակաւոր մասնագէտներ։