Прапаведнік Папскага дома: Святы Дух здзяйсняе адзінства
Навучанне св. Аўгустына
пра Касцёл было ў цэнтры чарговага велікапостнага казання прапаведніка Папскага Дома
айца Раньера Канталамесы, прамоўленага для Пантыфіка і супрацоўнікаў Рымскай курыі
21 сакавіка 2014 г. У ім капуцын нагадаў, што лучнасць з Касцёлам здзейсняецца праз
бачныя знакі – такія як сакрамэнты і Святое Пісанне, але таксама праз нябачную дзейнасць
Святога Духа – любоў і ласку. Гаворачы пра актуальную экуменічную сітуацыю святар
адзначыў, што сёння неабходна імкнуцца, разам з духоўным адзінствам у любові, да поўнага
адзінства таксама і ў сакрамэнтах, перш за ўсё ў Эўхарыстыі.
Але, на яго думку,
“нельга надаваць большую важнасць інстытуцыянальнаму адзінству” перад абліччам адзінства
духоўнага, адзначыў прапаведнік і дадаў, што адчувае большую блізкасць з прадстаўнікамі
іншых хрысціянскіх канфесій, які шчыра вераць у тыя самыя праўды, што і ён, любяць
Езуса Хрыста, распаўсюджваюць Евангелле і дэманструюць унутраныя знакі Святога Духа,
чым з католікамі, якія, аднак, абсалютна не цікавяцца Хрыстом і Касцёлам. “Пераследы,
такія часта здараюцца сёння ў пэўных частках свету, не раздзяляюць: не паляць цэрквы,
не забіваюць людзей за тое, што яны католікі ці пратэстанты, але за тое, што з’яўляюцца
хрысціянамі. Бо яны ўжо “адно”, - сказаў айцец Канталамеса.
Пра адзінства,
якое ўтварае паміж хрысціянамі Святы Дух, на яго думку, павінны памятаць усе вызнаўцы
Хрыста. “Сутнаснае адзінства ў навучанні і дысцыпліне будзе плёнам містычнага і духоўнага
адзінства, але ніколі не можа быць яго прычынай”, - адзначыў ён.
Такім чынам,
на думку прапаведніка, галоўныя крокі ў накірунку адзінства здзейсняюцца не за сталом
перамоваў ці ў прыняцці дэкларацый, хоць і яны неабходныя, але калі вернікі розных
канфесій, у братэрскай згодзе абвяшчаюць Езуса Хрыста, дзелячыся сваімі харызматамі,
прызнаючы адзін ў адным братоў і захоўваюць поўную паслухмянасць сваім Цэрквам.