Խրիմի մէջ Ուքրանական զինուորական կեդրոններ կը գրաւուին
Ռուսամէտ գործիչներ երէկ գրաւեցին Սեւասթոփոլի մէջ գտնուող ուքրանական ծովուժի կեդրոնատեղին:
Ուքրանական ծովուժի ղեկավար Սերհիյի Հայտուք ձերբակալուեցաւ եւ ուքրանական դրօշը կեդրոնէն
վար առնուեցաւ: Անոր տեղ բարձրացուեցաւ ռուսական դրօշը: Կեդրոնի ուքրանական անձնակազմի
բազմաթիւ անդամներ իրենց անձնական իրերով հեռացան զօրանոցէն: Շուրջ 200 անձեր զօրակայան
ներխուժելով ներկայացան ուքրանական աւագ պատասխանատուներու հետ բանակցելու: Քիեւ իր զինուորներուն
հրամայեց տեղւոյն վրայ մնալ, սակայն շարք մը զինուորներ, ոմանք արցունքը աչքերուն, իրենց
ապրանքները շալկած հեռացան կեդրոնէն: Այլ զինուորներ տակաւին կը գտնուին կեդրոնին մէջ
եւ կը մերժեն անձնատուր ըլլալ: Աւելի ուշ, սակայն, Ուքրանիա որոշեց իր ուժերը հեռացնել
Խրիմէն: Ուքրանիոյ պաշտպանութեան նախարարութիւնը հաղորդեց, որ նոյնպիսի դէպք մը պատահած
է Արեւմտեան Խրիմի մէջ գտնուող Նովօ¬Օզիոռն ծովուժի զօրանոցին մէջ: Ուքրանիոյ պաշտպանութեան
նախարարի պաշտօնակատար Իհոր Թենիուխ եւ առաջին փոխվարչապետ Վիթալի Եարեմա Խրիմ մեկնեցան
լարուածութիւնը վնասազերծելու համար, սակայն Խրիմի օդակայանի իշխանութիւնները չարտօնեցին,
որ անոնք Խրիմ մուտք գործեն: Մինչ Ռուսիոյ նախագահ Վլատիմիր Փութին Տումային փոխանցեց
Խրիմի` Ռուսիոյ միացման շուրջ օրինագիծը, Ռուսիոյ սահմանադրական խորհուրդը յայտարարեց,
որ Խրիմի` Ռուսիոյ միացման համաձայնագիրը ռուսական սահմանադրութեան համահունչ է: Ուքրանիան
հրաժարեցաւ ԱՊՀ¬ի նախագահութենէն: Աւելի ուշ, այդ երկիրը դուրս եկաւ ԱՊՀ¬էն: Քրեմլինի
բանբեր Տմիթրի Փեսքով յայտարարեց. «Եթէ մեր գործընկերներէն մէկը միակողմանի կերպով պատժամիջոցներ
հաստատէ, ապա մեր հետաքրքրութիւնը աշխարհի մէկ այլ բաժինին մէջ գտնուող գործընկերոջ մը
վրայ պիտի կեդրոնացնենք: Աշխարհը միաբեւեռ չէ, ուստի տնտեսական այլ գործընկերներու վրայ
պիտի կեդրոնանանք»: Փեսքով ըսաւ, որ «Ռուսիոյ դէմ ամերիկեան հաւանական պատժամիջոցները
անընդունելի են»` շեշտելով, որ «Ռուսիա պիտի շարունակէ տնտեսական գործակցութեան ձեռք
երկարել Եւրոպական Միութեան»: «Մենք կ’ուզենք Եւրոպական Միութեան ու Միացեալ Նահանգներու
հետ տնտեսական լաւ յարաբերութիւններ պահել, եւ Եւրոպական Միութեան հետ ունինք տնտեսական
յարաբերութիւններ, որոնք մեզի կը ստիպեն անոր հետ լաւ յարաբերութիւններ պահպանել»: ՕԹԱՆ¬ի
ընդհանուր քարտուղար Անտերս Ֆոկ Ռասմուսեն երեքշաբթի օր Ռուսիոյ հասցէին սուր քննադատութիւն
կատարած էր` ըսելով. «Խրիմի ճանաչումը անօրինական եւ անթոյլատրելի է, եւ դաշինքի անդամ
երկիրները չեն ընդունիր Խրիմի միացումը Ռուսիոյ»` աւելցնելով, որ «Ռուսիան կանգնած է
վտանգաւոր ուղիի վրայ»: ՕԹԱՆ-ի մամլոյ ծառայութիւնը յայտնեց, որ դաշինքը մտադիր չէ
զօրքեր մտցնել Ուքրանիա եւ կը պնդէ տագնապի խաղաղ լուծումին վրայ: ՕԹԱՆ երէկ երեկոյեան
յայտարարեց, որ Ռուսիոյ քայլերը պաղ պատերազմի աւարտէն ետք Եւրոպայի ամէնէն վտանգաւոր
սպառնալիքն են: