Японская фірма дапаможа Ватыканскай бібліятэцы ў аблічбоўцы манускрыптаў
Ватыканская апостальская
бібліятэка будзе супрацоўнічаць з японскай фірмай “NTT DATA”, якая прадастаўляе паслугі
ў сферы высокіх тэхналогій. Гаворка ідзе пра падпісанне чатырохгадовай дамовы аб аблічбоўцы
3 тыс. манускрыптаў з ватыканскіх збораў. Гэта 41 млн. старонак. 20 сакавіка 2014
г. у Ватыкане адбылася прэзентацыя сумеснага праекту. Гэта толькі адзін этап буйной
ініцыятывы па пераводзе ў лічбавы фармат 82 тыс. рукапісаў. Арцыбіскуп Жан-Луі Бруге,
Архіварыус і Бібліятэкар Святога Рымскага Касцёла, назваў праект абсалютным ноу-хау.
Ён дапаможа сувязям Ватыканскай бібліятэкі з установамі ў розных рэгіёнах свету, паколькі
рукапісы, аб якіх ідзе гаворка, датычаць гісторыі розных культур: ад дакалумбавай
Амерыкі да кітайскага і японскага Далёкага Усходу. Гэта ініцыятыва, на думку іерарха,
падкрэслівае “каталіцкасць”, а значыць універсальнасць Ватыканскай бібліятэкі.
Арцыбіскуп
не выключае, што пасля прадугледжанага дамовай чатырохгадовага тэрміну двухбаковае
супрацоўніцтва можа быць працягнута.
Усе рукапісы, пераведзеныя ў лічбавы фармат,
будуць даступны на сайце Ватыканскай бібліятэкі у выглядзе здымкаў высокай якасці,
што дазволіць шматлікім даследчыкам у розных галінах ведаў інтэрпрэтаваць каштоўныя
гістарычныя дакументы, доступ да якіх доўгі час быў абмежаваны.