Papa Françesku me Rrjetin Botëror të Shkollave për Takimin
Papa Françesku priti dje pasdite në Shtëpinë e Shën Martës, në Vatikan, disa përfaqësues
të Scholas, “Rrjeti Botëror i Shkollave për Takimin”. Duke folur me 40 personat e
pranishëm në këtë pritje, Papa i kushtoi një vëmendje të veçantë edukimit, sportit
dhe solidaritetit. Imzot Marcelo Sanchez Sorondo, nga Akademia Papnore e Shkencave,
tha se pritjen me Atin e Shenjtë e ka organizuar ai, “duke pasur parasysh projektet
e mëparshme me titull ‘Shkollat e të Afërmve dhe Shkollat e Vëllezërve’, nisur nga
Papa Françesku, kur ishte kryeipeshkëv i Buenos Airesit”. Ky rrjet botëror është i
hapur ndaj të gjitha shkollave, të çdo niveli. Simbol i kësaj nisme, ulliri. Papa
“mbolli” virtualisht një ulli, duke prekur ekranin e një tableti. Pastaj nisi këtë
tweet: “Përshëndes Rrjetin Botëror të Shkollave për Takimin. Sot mbjellim ullirin
e parë virtual për paqen”.