Papa Françesku: kush beson tek vetja e jo në Zotin, humb emrin e gjithçka
Njeriu që beson tek vetja, tek pasuritë e veta ose tek ideologjitë, nuk mund të jetë
i lumtur. Por, kush beson në Zotin, jep fryte edhe kur bën thatësirë. Kështu tha Papa
sot, gjatë meshës së mëngjesit, në Shtëpinë e Shën Martës. “Mallkuar njeriu
që në njeriun beson”, “njeriu që beson tek vetja”: do të jetë si “marena në shkretëtirë”,
e dënuar për t’u tharë pa fryte, për shkak të thatësirës. Papa niset nga leximi i
parë i sotëm, që, nga ana tjetër, thotë: “bekuar njeriu që beson në Zotin”, “është
si një pemë e mbjellë gjatë rrjedhës së ujit”, që në kohën e thatësirës “nuk resht
së dhëni fryte”. “Vetëm në Zotin – pohon Papa Françesku – kemi besim. Besimet e tjera
nuk shërbejnë, nuk na shpëtojnë, nuk na japin jetë, nuk na japin gëzim”. Edhe pse,
e dimë, “na pëlqen të kemi besim tek vetja, të kemi besim tek një mik, ose tek një
rrethanë e mirë, apo në një ideologji”, ndërsa “Zoti të rrijë pak mënjanë”. Njeriu,
kështu, mbyllet në vetvete, “pa horizonte, pa hapur as dyert, as dritaret” dhe “nuk
do të ketë shpëtim, nuk mund ta shpëtojë veten”. Është ajo që i ndodh pasanikut të
Ungjillit – shpjegon Papa – “kishte gjithçka: vishej me purpur, hante çdo ditë, në
bankete të mëdha”. “Ishte shumë i kënaqur”, por “nuk e vinte re se tek dera e shtëpisë,
i mbuluar me plagë”, ndodhej një i varfër. Papa nënvizon se Ungjilli përmend emrin
e të varfrit: quhej Lazër. Ndërsa i pasuri “nuk ka emër”: “E ky është mallkimi
më i fortë për atë që beson në veten, në forcat e veta, në aftësitë njerëzore e jo
në Hyjin: humbja e emrit. ‘Si e ke emrin?’. ‘Llogaria numër kaq, në filan bankë. Gjithë
ato prona, gjithë ato vila, gjithë ato...’ Si e ke emrin? Gjërat që kemi, idhujt.
E ti beson në ato. Ky njeri është i mallkuar”. Të gjithë e kemi këtë dobësi,
këtë brishtësi, pohon Papa. Shpresojmë ne veten tonë, ose në miqtë, ose në mundësitë
njerëzore dhe harrojmë Zotin. E kjo na çon në rrugën e moslumturisë: “Sot, në
këtë Kreshmë, do të na bëjë mirë ta pyesim veten: ku besoj unë? Në Zotin, apo jam
pagan, se besoj tek gjërat, tek idhujt, që kam prodhuar vetë? A e kam ende një emër,
apo kam filluar ta humb emrin dhe quhem ‘unë’? Unë, mua, me mua, për mua, vetëm unë?
Për mua, për mua... gjithmonë po ai egoizëm: ‘unë’. Kjo nuk na shpëton”. Por,
“në fund – vëren Papa Françesku – ekziston një derë shprese” për ata besojnë në vetveten
dhe “e kanë humbur emrin”: “Tek e fundit, tek e fundit, tek e fundit, gjithmonë
gjendet një mundësi. E ky njeri, kur u kujtua se e kishte humbur emrin, kishte humbur
gjithçka, gjithçka, çon sytë dhe thotë vetëm një fjalë: ‘Atë’. Dhe fjala e Hyjit është
vetëm një: ‘Bir!’. Nëse disa nga ne, gjatë jetës, për shkak të besimit tek njeriu
dhe në vetveten, e humbim emrin, e humbim këtë dinjitet, mbetet mundësia për ta thënë
këtë fjalë, që është më shumë se magjike, është më shumë, e fortë: ‘Atë’. Ai na pret
gjithmonë, për të hapur një derë, që ne nuk e shohim, e do të na thotë: ‘Bir’. T’ia
kërkojmë Zotit hirin, që të na japë të gjithëve urtinë dhe të besojmë vetëm në të,
jo tek gjërat, tek forcat njerëzore, por vetëm në të”.