Յարգէ՝ որ յարգուիս: Անցեալի
փառքով ապրող, անցեալը դրամագլուխի վերածած մարդոց գործելու ժամանակը փակուած կը նկատէ
ներկայի քաղաքակիրթ աշխարհը: Ամէն մարդ իր արժանիքը պիտի կերտէ, ու անով արժեւորուի:
Այլապէս պարտադիր յարգանքը, կամ կեղծ պատկառանքը կրնան ժխտական անդրադարձ ունենալ ընկերութեան
կեանքին վրայ: Ոմանք արտաքին տեսքին կարեւորութիւն տալով, ըստ այնմ կը դատեն: Նոյնիսկ
յարգանքի որոշ մաս, այդպիսիներ կը վերապահեն արտաքին տեսքին: Արեւելեան ժողովրդային
իմաստութեան օրինակ հանդիսացող ագշէհիրցի իսլամ կրօնաւորը խրախճանքի հրաւիրուած ըլլալով,
երբ բացառիկ յարգանք կը տեսնէ իր շուրջ, հրամցուող ճաշերու ամանները բռնելով կը մօտեցնէ
զգեստին, ու կ՛ըսէ. _ Հրամմէ՛, կե՛ր, այս ամբողջ պատիւը քեզի համար է: Հաստատութիւններու,
հիմնարկներու, մեծ թէ փոքր ընկերութիւններու տարազները, մանաւանդ կրօնաւորական տարազները,
բոլոր կրօններու պարագային, բացառիկ յարգանքի կ՛արժանանան պաշտօնական բոլոր կառոյցներու
կողմէ: Նման անձեր, ոմանց կողմէ ալ՝ անարգանքի կամ ծաղրանքի առարկայ կը դառնան։ Զինուորը
իր տարազին նկատմամբ ունեցած յարգանքով կը բարձրանայ, ու տարազին հետ իր անձը նոյնացնելով
կը յարգուի: Այսպէս կը սորվեցնեն նորընծայ բանակայիններուն, երբ անոնց կը յանձնեն այն
կապոցը, որուն մէջ խնամքով ծալլուած կ՛ըլլայ զինուորական տարազը: Բարձրաստիճան եկեղեցականներէն
մէկը հրապարակաւ յանդիմանեց այն աշխարհականը, որ համարձակած էր իր հոգեւորական երիտասարդ
ընկերոջ ուսին դնել ձեռքը, մտերիմ բարեկամութիւն ցուցաբերելու համար: Սքեմին նկատմամբ
յարգանքը շատ մեծ էր այդ տարեց հոգեւորականին մօտ, որուն կեանքը սքեմին հետ շաղախուած
էր: Ոմանք ալ այնքան կը նոյնանան իրենց տարազին հետ, որ բուն մարդը կը կորսուի այլեւս:
Իսկ ուրիշներ, երբեմն հրաժարելով իրենց նախկին հանգամանքէն, դեռ անոր մէջ կը զգան իրենց
անձը, նոյնիսկ այն յարգանքը ակնկալելով հանրութենէն, զոր կը ստանային անցեալին: Քաղաքի
ոստիկանապետ մը որ ծանօթ էր, նոյնիսկ իր թաղեցիներուն նկատմամբ, իր անգութ եւ դաժան նկարագրով.
հանգստեան կը կոչուի, ու կը շարունակէ բնակիլ նոյն թաղին մէջ: Թաղեցիներուն համար սկզբնական
շրջանին տարօրինակ էր զինք տեսնել սովորական քաղաքացիի զգեստով: Ոմանք նոյնիսկ կը շարունակէին
ակնածիլ իրմէ, կարծելով թէ ան կրնայ տուգանել կամ պատժել զիրենք: Սակայն հետզհետէ վարժուեցան,
եւ հասաւ օր, երբ ո՛չ ոք կը յարգէր զինք այլեւս: Սովորական բարեւ տուո՛ղ ալ չմնաց իրեն:
Մարդը սկսաւ նեղանալ, նոյնիսկ բարկանալ, որ իրեն պէս տարիներո՜ւ ծառայութիւն ունեցող
մէկը ինչո՞ւ պիտի չյարգուի: Ճիշդ կողքի դրացին, որ առ ի քաղաքավարութիւն բարեւը չէր կտրած
անկէ, երբ զգաց այս մարդուն տագնապը, բարեկամաբար մօտենալով յիշեցուց թէ ի՜նչ դաժան եղած
էր ինք ամէնուն նկատմամբ: Սակայն մարդը չէր ուզեր հասկնալ ըսուածները, եւ դեռ կը պնդէր,
ըսելով թէ ինք օրէ՛նքը գործադրած էր: Այն ատեն դրացին կը պատմէ առակ մը. ՜՜Անտառին
շատ մօտիկ ապրող գիւղացին, իր ախոռին մէջ մէկ հատ էշ ունէր: Օրին մէկը դուռը բաց մոռցած
ըլլալով, էշը ուղղակի անտառ մտաւ: Հոս ու հոն արածած ժամանակ կորսուեցաւ անտառին խորերը:
Խոտ կերած ատեն, յանկարծ գլխուն սատկած այլ կենդանիի մորթ փաթթուեցաւ: Էշը ինչքան շարժեց
գլուխը, չկրցաւ այդ մորթը վար ձգել: Նոյնիսկ չիմացաւ թէ ի՞նչ էր այդ: Բարեբախտաբար աչքերուն
մասը բաց մնացած էր: Ուստի կամաց-կամաց անիկա վերադարձաւ իր տունը: Հազիւ գիւղին մօտեցած,
տեսաւ բոլոր իրեն ծանօթ կենդանիները, դրացի ագարակներու, որոնք յարգանքով կը մօտենային
իրեն: Դուն մի ըսեր, սատկած առիւծի մորթ փաթթուէր էր խեղճին գլխուն, եւ միւս կենդանիները
միշտ ակնածելով առիւծէն, սկսան յարգանք տածել իրեն նկատմամբ, իբրեւ անտառին թագաւորը…:
Բայց էշը ինք զարմացած էր, առանց իմանալու թէ ի՞նչ կը կատարուի, ինչո՞ւ զինք այդքան կը
յարգեն: Քիչ ետք, երբ կը ծարաւի, կը մօտենայ ջուրին, եւ երբ կը ծռի խմելու, յանկարծ գլուխէն
կ՛իյնայ առիւծի մորթը: Շուրջը հաւաքուած կենդանիները կը սկսին ծիծաղիլ, եւ նոյնիսկ իրենց
տգիտութիւնը ձաղկել, ըսելով. չիմացանք, առիւծ չէ եղեր ասիկա…: Յարգանքը անպակաս պէտք
է ըլլայ մարդոց կեանքէն: Սակայն, միշտ ա՛նձն է որ պէտք է յարգուի նախ, եւ ապա՝ անոր հանգամանքը:
Ինչքա՜ն պիտի կրկնուի դեռ ծանօթ առածը, որ մեր ժողովուրդը զանազան առիթներով այդքան
կը սիրէ յիշեցնել. _ Յարգէ՝ որ յարգուիս: