Tiranë: Gëzimi i jetës do të jetë në qendër të takimit të delegatëve europian për
baritoren universitare
Rreth 30 pjesëmarrës, përgjegjës kombëtarë për baritoren universitare të Konferencave
Ipeshkvnore të Europës dhe të lëvizjeve kishtare europiane zhvillojnë një takim në
Tiranë duke filluar nga sot, 23 mars në mbrëmje deri më 26 mars paradite.
Tema
e konferencës “Gëzimi i jetës si dhuratë që të jepet apo si thesar që duhet kërkuar”
(Gj. 10,10; 15,11), është një temë e një rëndësie të veçantë në detyrën e kapelanit
universitar.
Punimet do të fillojnë me përshëndetjen e Mons. Marek Jędraszewski,
president i Seksionit Universitar të Komisionit “Katekizëm, Shkollë dhe Universitet”
të KKIE si dhe të don Michel Remery, Zv –Sekretar i Pëgjithshëm i KKIE.
“Ambienti
universitar është vendi i studimeve kërkimore, përpunuese si dhe vëndi i transmetimit
të dijes në shkallën më të lartë. Për të qenë e plotë kjo “dije” nuk kufizohet në
kërkimet thjesht shkencore, por në plan të parë edhe në kërkimin e burimit të lumturisë
së vërtetë në jetë” shprehet don Michel Remery, Zv –Sekretar i Pëgjithshëm i KKIE.
Më poshtë vazhdon “I riu, student nuk e kupton gjithnjë që po kufizohet në kërkimin
e mirëqënies se përkohshme dhe fluturake që nuk arrin të shuajë etjen e tij të
lindur për gëzim e lumturi. Kisha mund t’i ofrojë çdo studenti të angazhuar në këtë
kerkim, burimin e vërtetë të një gëzimi të qëndrueshëm e të plotë: Krishtin. Kjo është
detyra e baritores universitare sot: të krijojë pra lidhje mes kërkimit të thjesht
shkencor dhe kërkimit të personalitetit të të riut dhe të lumturisë. Kjo është një
sfidë edhe më urgjente në Shqipëri, një vend që ka vuajtur një ateizëm të detyruar
nga Shteti e që sot kërkon lumturinë e tij të vërtetë”.
Punimet parashikojnë
ndërhyrjet e prof. Kaja Kamierska, e cila do të bëjë një përmbledhje të literaturës
aktuale mbi jetën e studentëve universitarë sot, si dhe një ndërhyrje nga don José
Claveria i cili do të shtrojë pyetje mbi faktin se si Ungjilli bëhet pjesë e eksperiencës
së studentëve universitarë.
Gjatë takimit, pjesëmarrësit do të kenë mundësinë
të flasin mbi situatën e baritores universitare në vendet përkatëse dhe do të përballen
me çështje të ndryshme: cilat janë kompetencat dhe burimet që një kapelan universitar
mund t’u ofrojë studentëve; si mund të shpallet Krishti sot; si kërkohet sot Krishti
në një shoqëri post – ateiste?
Ditët e takimit do të ndërthuren me momente
lutjeje dhe kremtimesh eukaristike. Punimet do të zhvillohen me dyer të mbyllura.
Në fund të punimeve do të shpërndahet një komunikatë shtypi.