Սուրիոյ բանակը Եապրուտը առաւ իր վերահսկողութեան տակ
Սուրիոյ կանոնաւոր բանակը երէկ Քալամուն շրջանի մայրաքաղաք Եապրուտ քաղաքը առաւ իր վերահսկողութեան
տակ: Բանակը քաղաք ներխուժած էր երեք առանցքներէ: «Մայատին» պատկերասփիւռի կայանը
կը հաղորդէ, որ քաղաքին մէջ գտնուող Ժապհաթ Նուսրայի, ՏԱՀԵՇ-ի եւ այլ իսլամական խմբաւորումներու
զինեալները ծանր կորուստներ կրելէ ետք փախուստի դիմած են: Մինչ կարգ մը տեղեկութիւններ
խօսեցան անոնց դէպի Ռանքուս եւ Ֆլիթա փախուստին մասին, ըստ «Մայատին»-ի, աւելի քան հազար
զինեալներ փախուստ տուած են Լիբանանի Արսալ քաղաքի շրջանը, ուր սուրիական օդուժը Արսալը
եւ սուրիական Ֆլիթան իրարու կապող ճամբաներուն վրայ յարձակումներ գործեց: «Մայատին»
կը նշէ, որ Եապրուտը ընդդիմադիր զինեալներուն Լիբանանի սահմանին մօտ գտնուող վերջին մեծ
կեդրոնն է: Անոր վերատիրանալով սուրիական վարչակազմը այժմ ապահովեց մայրաքաղաք Դամասկոսէն
դէպի Միջերկրականի ծովափ ցամաքային ճամբան, ինչպէս նաեւ Լիբանանէն ընդդիմադիր զինեալներու
մատակարարման ճամբան փակեց: