Беларускія вернікі
далучыліся да акцыі “40 дзён за жыццё”, сутнасць якой у тым, каб падчас Вялікага посту
хрысціяне маліліся за ненароджаных дзяцей, аб захаванні жыцця, памнажэнні любові,
пакаянні з граху аборта. Гэтай традыцыі – больш за 10 гадоў, упершыню такая акцыя
прайшла ў ЗША ў 2004 г. У Беларусі такая малітва праходзіць ужо другі год па ініцыятыве
руха “Пралайф”, паведаміла яго кіраўнік Таццяна Тарасевіч, і гэта малітоўная кампанія
ўжо прынесла свае вынікі.
“У мінулым годзе мы пачалі гэту малітву падчас Вялікага
посту, і потым мне паведаміла адна наша кансультант (валанцёр, якая праводзіць гутаркі
з цяжарнымі падчас крызісу, калі ёсць пагроза аборту), што ў іх жаночай кансультацыі
падчас гэтай малітвы не было абортаў. Магчыма, яны былі мінімізаваны, або жанчыны
не даходізілі да іх, або нешта іншае, але аборты падчас посту ў гэтай кансультацыі
не праводзілі – гэта факт. Таму мы ведаем, што малітва эфектыўная”, упэўнена Таццяна
Тарасевіч.
Малітва “40 дзён за жыццё” аб’ядноўвае вернікаў на ўсёй планеце.
За гэты час больш за 30 абартарыяў у свеце зачыніліся толькі дзякуючы таму, што валанцёры
і неабыякавыя да праблемы людзі прыходзілі і маліліся каля гэтых клінік. Часам, яны
стаялі там і не адзін год, але ў рэшце рэшт пераконвалі тых, хто лічыў аборт нормай.
Спачатку малітва, потым адукацыя і дзеянне – на гэтых трох кітах трымаецца і рух “Пралайф
Беларусь”, на сайце якога размешчаны і адпаведныя малітвы. Бо жадаючых далучыцца да
акцыі – шмат.
“Людзі звярталіся, шукалі Канон, малітвы, цалкам можна Канон
чытаць, або не, прасілі, каб мы дасылалі тэкст у нейкім фармаце, пыталі, можна ці
не далучыцца не з першага дня, а на пяты, як маліцца дома ці ў групе і іншае. Гэта
значыць, што ёсць вялікая зацікаўленасць у такой супольнай малітве. І нашы валанцёры
адзначаюць, што для іх гэта не толькі натхненне падчас Вялікага посту, але і сведчанне
сумесных дзеянняў”, - кіраўнік руха “Пралайф” у Беларусі.
У асноўным да малітвы
далучаюцца вернікі хрысціянскіх канфесій – католікі, праваслаўныя і пратэстанты. Уключыцца
ў гэтую хвалю ніколі не позна, бо кожны голас дапамагае пераважыць жыццю на шалях
гэтага свету, пераадольваючы згубную практыку абортаў.