Papa ipeshkvijve të Timorit Lindor: bota është plot me të “lënduar”, ngrohini zemrat
me Ungjill
Jini “ndërgjegjja kritike e kombit”, shpallni Ungjillin e mëshirës dhe përpiquni,
që kumti të jetë i kuptueshëm “në gjuhët vendore”. Tri janë pikat, që Papa Françesku
u beson si angazhim ipeshkvijve të Timorit Lindor, të cilët i priti sot paradite në
vizitën ad Limina. Pesëqind vjet me Ungjillin janë një histori e gjatë feje dhe,
në një kontinent si Azia, ku zakonisht Kisha përfaqëson bashkësi të vogla në numër,
97% e popullsisë së Timorit Lindor është e pagëzuar. Kjo tregon frytet e begata të
farave të Ungjillit, mbjellë gjatë shekujve. Por, as ishulli i vogël, kufitar me Indonezinë,
nuk ka mbetur pa u prekur nga ato, që Papa Françesku i quan “befasitë e dhimbshme”,
të cilat, gjatë viteve të fundit, janë shfaqur dukshëm në shoqërinë ishullore. Procesi
i ndërtimit të një kombi “të lirë, solidar dhe të drejtë për të gjithë”, që filloi
në fund të viteve nëntëdhjetë, e ka nxitur disa herë Kishën vendore “të kujtojë –thotë
Papa – bazat e domosdoshme të një shoqërie, që synon të jetë e denjë për njeriun dhe
për thirrjen e tij të përtejme”. Papa Françesku u drejtohet ipeshkvijve timorezë,
“i sigurt” se, bashkë me meshtarët, do të vijojnë të kryejnë funksionin e “ndërgjegjes
kritike të kombit, “duke ruajtur pavarësinë nga pushteti politik”, dhe duke ia lënë
atij “përgjegjësinë për t’u marrë me të mirën e përbashkët të shoqërisë”. Për sa
i përket jetës së brendshme të Kishës, Papa bën thirrje për t’i “dyfishuar përpjekjet
e ungjillëzimit”, dhe kujton se Ungjilli duhet shpallur me gjuhën e mëshirës. Pa mëshirën,
thotë Papa, “e kemi të pamundur të hyjmë në një botë plot me ‘të lënduar’, që kanë
nevojë për mirëkuptim, për falje, për dashuri”. Është realizimi praktik i “revolucionit
të butësisë”, për të cilin flet edhe Evangelii gaudium. Por, kush ungjillëzon dhe
si? Papa i përgjigjet kësaj pyetjeje, duke treguar udhën e “formimit solid” të meshtarëve,
rregulltarëve dhe laikëve. Kjo nuk do të thotë se duhet pretenduar, që ungjillëzimin
ta bëjnë “vetëm veprimtarët e specializuar”, sepse, “nëse dikush e ka përjetuar vërtet
dashurinë e Hyjit, që shpëton, nuk ka nevojë për shumë kohë përgatitje për ta shpallur,
nuk mund të presë që t’i jepen mësime të shumta, ose udhëzime të gjata. Çdo i krishterë
është misionar në atë masë në të cilën ka njohur dashurinë e Hyjit në Krishtin Jezus”. Pika
tjetër themelore është ajo e nevojës “për të ungjillëzuar kulturat, me qëllim që të
inkulturohet Ungjilli”. Nëse, në kontekstet e ndryshme kulturore të Timorit Lindor
– pohon Papa – feja dhe ungjillëzimi nuk janë të afta të flasin për Hyjin, të shpallin
fitoren e Krishtit mbi dramën e gjendjes njerëzore, t’i bëjnë vend Shpirtit përtëritës,
kjo ndodh sepse [feja dhe Ungjilli] nuk janë mjaftë të gjallë në bashkësitë e krishtera,
të cilat kanë nevojë të formohen e të piqen”. “E gjithë kjo sjell një sërë sfidash,
për ta bërë më të lehtë kuptimin e Fjalës së Hyjit dhe më të dobishme marrjen e sakramenteve.
Por sfida – thekson Papa – nuk është kërcënim. Në fund Ati i Shenjtë u jep këtë
porosi ipeshkvijve të Timorit Lindor: “Jini njerëz të aftë për të mbështetur, me dashuri
e durim, hapat e Hyjit brenda popullit të tij dhe vlerësoni çfarë e mban atë të bashkuar,
duke e ruajtur nga rreziqet e mundshme, por mbi të gjitha duke ia rritur shpresën”.