Nënshkruhet në Vatikan marrëveshja ndërfetare kundër skllavërive moderne
Çrrënjosja e skllavërisë moderne dhe tregtia e qenieve njerëzore në të gjithë botën
brenda vitit 2020 është synimi i marrëveshjes revolucionare, që u bë e njohur sot
në Vatikan. Kjo marrëveshje ndërmjet besimeve të ndryshme fetare, e para e llojit
të vet, hap edhe Rrjetin Global të Lirisë (Global Freedom Network), që ka si ortak
kryesor Fondacionin e Ecjes së Lirë (Walk Free Foundation). Memorandumi i mirëkuptimit
dhe deklarata e përbashkët, që janë themeli i Rrjetit Global të Lirisë, mbajnë nënshkrimet
e mëposhtme: në emër të Papës Françesku, Kancelari i Akademisë Papnore të Shkencave
dhe të Shkencave Shoqërore, Imzot Marcelo Sanchez Sorondo; në emër të kryeimamit të
Al Azharit, Egjipt, Dr. Mahmud Azab; në emër të kryeipeshkvit të Kantërbërit, përfaqësuesi
i kreut të Kishës Anglikane pranë Selisë së Shenjtë, Sër David John Moxon; në emër
të Fondacionit Ecja e lirë, vetë themeluesi, Andrew Forrest. Deklarata e përbashkët,
hartuar nga nënshkruesit e Rrjetit Global të Lirisë, nënvizon efektet shkatërruese
të dhunës së skllavërisë moderne dhe të tregtisë së qenieve njerëzore dhe i fton Kishat
e tjera të krishtera, si edhe besimet e tjera fetare të botës, të bashkohen me këtë
nismë. Rrjeti Global i Lirisë është një shoqatë e hapur, prandaj në të ardhmen do
të ftojë edhe udhëheqës të tjerë shpirtërorë.