Барталамей I: католікі і праваслаўныя сёння бліжэй да сябе, чым гэта было на працягу
ўсяго другога тысячагоддзя
Дзякуючы “дыялогу
любові” і “дыялогу ісціны”, Праваслаўныя Цэрквы і Рыма-каталіцкі Касцёл як “Цэрквы-сёстры”
сёння бліжэй да сябе, чым гэта было на працягу ўсяго другога тысячагоддзя, падкрэсліў
Патрыярх Канстынтынопальскі ў інтэрв’ю інфармацыйнаму агенцтву “Zenit”. У апошнія
дзесяцігоддзі былі зроблены важныя крокі да паяднання. “Тым не менш, мы ўсё яшчэ далёкія
ад адзінства, якім адзначалася першае тысячагоддзе жыцця Касцёла”, - заявіў Барталамей
І.
Самае галоўнае, на думку Прадстаяцеля, ніколі не забывацца аб жаданні Езуса:
“каб усе былі адно”. Падзел Касцёла, гэта сапраўдны скандал для Хрыстовага цела, бо
сёння больш чым калі-небудзь раней патрэбна агульнае сведчанне хрысціян перад абліччам
сучасных выклікаў. Патрыярх прызнаўся, што шчыра моліцца, каб сустрэча паміж ім і
Папам у Іерусаліме ўмацавала ўзаемасувязь паміж Рыма-Каталіцкім Касцёлам і Праваслаўнай
Царквой.
Барталамей I падкрэсліў сваю заклапочанасць лёсам хрысціян на Блізкім
Усходзе. Ён адзначыў: “Нашы Цэрквы павінны прапаведаваць мір там, дзе ідзе вайна,
яны павінны абвяшчаць любоў там, дзе ёсць нянавісць, і талерантнасць там, дзе існуе
дыскрымінацыя”. Гэтыя прынцыпы, паводле іерарха, маюць фундаментальнае значэнне для
сітуацыі хрысціян у блізкаўсходнім рэгіёне. Ён выказаў глыбокую занепакоенасць ростам
палітычнай нестабільнасці і насілля ў Палестыне, Егіпце, Іраку, і асабліва ў Сірыі.
Барталамей І “глыбока расчараваны” абыякавасцю і неапраўданай бяздзейнасцю палітычных
уладаў гэтых краін, якія не змаглі абараніць хрысціян і ў цэлым сваіх грамадзян.