Եօթներու խմբակը Ռուսիան կը զգուշացնէ Խրիմը իրեն կցելէն
Եօթներու խմբակի անդամ երկիրներու ղեկավարները Ռուսիոյ կոչ ուղղեցին Խրիմը իրեն կցելու
բոլոր ջանքերը դադրեցնելու` յայտնելով, որ եթէ Ռուսիա այդպիսի քայլ մը առնէ, «իրենք առանձնաբար
եւ հաւաքաբար յաւելեալ քայլեր պիտի որդեգրեն»: Եօթներու խմբակի ղեկավարները նաեւ ընդգծեցին,
որ իրենք 16 մարտին Խրիմի մէջ նախատեսուած հանրաքուէի արդիւնքները պիտի չճանչնան: Նշենք,
որ եօթներու խմբակի անդամներն են Բրիտանիան, Քանատան, Ֆրանսան, Գերմանիան, Իտալիան, Ճափոնը
եւ Միացեալ Նահանգները: Մինչ այդ, Ուքրանիոյ ազգային անվտանգութեան ղեկավար Անտրէյի
Փարուպիյի զգուշացուց, որ Ուքրանիոյ սահմանին վրայ մեծաթիւ ռուսական զօրքեր հաւաքուած
են: «Ռուսական բանակը Քիեւէն միայն 2¬3 ժամ հեռաւորութեան վրայ կը գտնուի», ըսաւ ան`
աւելցնելով, որ Ուքրանիոյ զինեալ ուժերը դիրքաւորուած են որեւէ ուղղութենէ եկող յարձակում
մը ետ մղելու համար: «Ռոյթըրզ» լրատու գործակալութիւնը հաղորդեց, որ Պուլկարիոյ, Ռումանիոյ
եւ Միացեալ Նահանգներու ծովուժերը Սեւ ծովու արեւմտեան հատուածին մէջ կը կատարեն միացեալ
ռազմափորձեր, որոնք նախապէս յետաձգուած էին եղանակային անբարենպաստ պայմաններու պատճառով:
Ամերիկեան կողմը ընդգծած է, որ ամերիկեան «Թրաքսթըն» մարտանաւի Սեւ ծովուն մէջ ներկայութիւնը
որեւէ կապ չունի Ուքրանիոյ մէջ ստեղծուած ներքաղաքական ճգնաժամի հետ: «ՌԻԱ Նովոսթի»
կը հաղորդէ, որ Պիելոռուսիոյ նախագահ Ալեքսանտր Լուքաշենքօ իր երկրին Ազգային անվտանգութեան
խորհուրդի նիստին ընթացքին յայտնած է. «Պիելոռուսիան պատշաճ պատասխան պիտի տայ ՕԹԱՆ¬ի
ուժերու երկրի սահմաններուն մօտ ամրապնդման»` աւելցնելով, որ «Պիելոռուսիան Ռուսիոյ պիտի
առաջարկէ լրացուցիչ 15 օդանաւ տեղակայել երկրին մէջ»: Ըստ անոր, իրենք պարտաւոր են արձագանգել
եւ պաշտպանել իրենց շահերը: