Прапаведнік Папскага дома: мы можам бачыць далей з дапамогай Айцоў Касцёла
Прапаведнік Папскага
дома, італьянскі капуцын Раньера Канталамеса лічыць, што сёння асабліва актуальна
звярнуцца да духоўнай спадчыны Айцоў Касцёла – св. Аўгустына, св. Амброзія, св. Льва
Вялікага і св. Грыгорыя Вялікага – сапраўдных “гігантаў”, як іх называлі ў сярэдневеччы.
Менавіта гэта параўнанне дало назву цыклу велікапостных казанняў, з якімі ён пазнаёміць
Папу і супрацоўнікаў Рымскай курыі ў бліжэйшы час – “На плячах у гігантаў”. Менавіта
“з плячэй” Айцоў Касцёла, на думку святара, мы можам бачыць далёка – нават далей за
іх саміх.
У інтэрв’ю Ватыканскаму радыё айцец Канталамеса нагадаў, што ў 2012
г. ён ужо прамаўляў велікапостныя казанні на тэму навучання Айцоў Касцёла, але тады
гаворка ішла пра грэцкіх святых. Сёлета ў цэнтры ўвагі будуць лацінскія.
З
дапамогай навучання св. Аўгустына прапаведнік распавядзе пра актуальныя праблемы Касцёла
і экуменічныя адносіны. Праз спадчыну св. Амброзія – пра Эўхарыстыю і асобу Хрыста.
Гэта, на думку святара, дапаможа ясней убачыць вобраз Пана, які на працягу апошніх
гадоў часта скажаецца тэлебачаннем, кіно і літаратурай. Св. Грыгорый Вялікі дапаможа
ўбачыць у Бібліі пасланне любові, напісанае Стварыцелем свайму стварэнню.
На
думку прапаведніка Папскага дома, найбольш актуальным сёння з’яўляецца навучанне св.
Аўгустына – недарэмна на паліцах амаль усіх сучасных кнігарняў можна знайсці яго кнігі.
Айцец Канталамеса з іроніяй падкрэсліў, што св. Аўгустын пазбавіў сваіх нашчадкаў
магчымасці быць арыгінальнымі, таму што сам сказаў амаль усё.
Серыю сваіх велікапостных
казанняў капуцын пачне 14 сакавіка 2014 г., у Ватыкане. Папа Францішак не будзе прысутнічаць
на першым з іх, паколькі прымае ўдзел у рэкалекцыях па-за Ватыканам.