Papa, në Korenë e Jugut nga 14 deri më 18 gusht, do të lumnojë një grup martirësh
të ‘800-ës
Duke pranuar ftesën e Presidentit të Republikës dhe të Ipeshkvijve koreanë, Shenjtëria
e Tij Françesku do të bëjë shtegtimin e tretë apostolik në Republikën e Koresë, nga
14 deri më 18 gusht 2014. Rasti është Dita VI e Rinisë Aziatike, që do të kremtohet
në dioqezën Daejeon. Zëdhënësi i Vatikanit, atë Federiko Lombardi saktëson, për mediat,
se Papa do të kryesojë edhe kremtimin e Lumnimit të një grupi martirësh koreanë.
“Në
Azi duhet shkuar. Sepse Papa Benedikti XVI nuk pati kohë ta bëjë këtë, e është tejet
e rëndësishme”. Jemi më 28 gushtin e vitit të kaluar, në Ditën Botërore braziliane
të Rinisë, që sapo ka përfunduar. Papa bisedon ëmbël, sipas traditës, me gazetarët,
nësa lë pas kontinentin amerikan, për t’iu afruar atij evropian. Për një çast shikimi
i tij shkon shumë përtej, në lindje. Në fjalët e Françeskut ndjehet zelli i zjarrtë
i bariut, që ëshë mësuar ta ketë si qendër të misionit të tij, çdo skaj e skutë të
botës. Sepse qendra, për Papën, është periferia. E nësa mendon për të, kujton vizionin
e Gjon Palit II, 15 vjet më parë, në prag të Jubileut. Papa Vojtila pohon qartë në
Nxitjen Apostolike “Ecclesia in Asia”: “Ashtu si në mijëvjeçarin e parë, kryqi u mboll
në trojet evropiane, në të dytin, në ato amerikane e afrikane, në mijëvjeçarin e tretë
shpresojmë të kemi të korra të begata feje në këtë Kontinent të pakufishëm e plot
gjallëri.” Papa, që pas një muaji e gjysëm do të shpallet shenjt, fliste për një
përvojë, që e kishte jetuar dy herë, në maj 1984 e në tetor 1989, duke shkelur në
pjesën jugore të gadishullit të ndarë nga paraleli i 38-të e, sidomos, nga lufta vëllavrasëse.
Papa Françesku përgatitet të ecë në gjurmët e tij, 25 vjet më pas, me një mendim
të mirëpërcaktuar në zemër, shprehur më 13 janarin e kaluar në audiencën me Trupin
Diplomatik, akredituar në Vatikan: “Me rastin e 50-vjetorit të marrëdhënieve
diplomatike me Republikën e Koresë, dëshiroj ta lus Zotin për dhuratën e pajtimit
në gadishull, duke uruar që, për të mirën e të gjithë popullit korean, palët e interesuara
të mos lodhen duke kërkuar pikat e takimit e rrugëzgjidhjet e mundshme. Azia ka një
histori të gjatë bashkëjetese paqësore ndërmjet grupeve të ndryshme civile, etnike
e fetare”. Një shtegtim, pra, për të folur për paqen në një tokë, që jeton
në kushtet e luftës së ftohtë, që prej 50 vjetësh; e për të përqafuar të rinjtë, protagonistë
të asaj, që mund të shikohet si një DBR aziatike. Por në zemër të Papës Françesku
është e do të jetë, sidomos, fati i Kishës së vogël lokale, pakicë që, herë pas here,
kronikat e përshkruajnë plot gjallëri, gjithnjë të mbështetur mbi shpatullat e viganëve,
që e themeluan me çmimin e gjakut të tyre. Prej këndej, Ati i Shenjtë, gjatë vizitës,
do të lartojë në nderimet e elterit Shërbëtorin e Hyjit, Pal Yun Ji-chung, laik, dhe
123 shokët e tij, të mbytur nga urrejtja për fenë, ndërmjet viteve 1791 e 1888, për
të cilët ai vetë e ka nënshkruar tashmë dekretin e Lumnimit. Nga Seuli, kryeipeshkvi
Andre Yeom Soo-jung e falënderoi menjëherë, përmes një mesazhi, Papën Françesku, sepse
me këtë shtegtim, kujtohet për rininë aziatike e për besimtarët koreanë, duke i vënë
në qendër të vëmendjes. E falënderimin e shprehu edhe nga elteri, duke kremtuar një
Meshë për shtegtimin e Papës Françesku, “që e do me zemër Korenë”, siç u shpreh kryeipeshkvi,
e shtoi: “Shpresoj se kjo vizitë do të jetë rast i përshtatshëm, që njerëzit e varfër
e të shtypur të rigjejnë shpresat e humbura. E sidomos lutem që vizita e Papës Françesku
të sjellë pajtim e paqe në gadishullin korean”.