Transparencë në administrimin ekonomik dhe kujdes për të varfërit: kështu Papa instituteve
fetare
Përfundoi sot në Romë, Simpoziumi i ekonomëve të përgjithshëm të 500 Instituteve të
Jetës Rregulltare, mbledhur në Universitetin Papnor Antonianum nga të gjitha anët
e botës për të diskutuar mbi mënyrën e administrimit të pasurive kishtare. Në mesazhin,
që u drejtoi atyre, Papa Françesku sqaron ç’ka ndërmend kur thotë se Kisha duhet të
jetë e varfër. “Nuk na duhet ndonjë varfëri teorike – shkruan Ati i Shenjtë – por
një varfëri, që mësohet duke prekur trupin e Krishtit të varfër, në të përbuzurit,
në të varfërit, në të sëmurët, në të vegjlit”. Duhet të vigjëlojmë, porosit Papa,
që pasuritë e Instituteve rregulltare të administrohen me transparencë e kujdes, pa
shpërdorime e duke i përdorur mirë të gjitha burimet e mundshme për të plotësuar misionin
kryesor të Kishës, atë të solidaritetit me të varfërit e me mjerimin material, moral
e shpirtëror. Institutet e jetës rregulltare dhe Shoqëritë e jetës apostolike, përfundon
Ati i Shenjtë, duhet të dëshmojnë qartë se parimi i dhënies falas dhe logjika e dhurimit
mund të gjejnë vend në çdo veprimtari ekonomike.