Papa Këshillit Ekumenik të Kishave: përpara, me besim drejt bashkimit të të krishterëve
Ndarjet e të krishterëve nuk duhen pranuar me nënshshtrim; të ecim përpara me besim,
drejt bashkimit. Është ky urimi i Papës drejtuar delegacionit të Këshillit Ekumenik
të Kishave (Wcc), kryesuar nga sekretari i përgjithshëm, i nderuari Olav Fykse Tveit,
pritur sot paradite, në Vatikan.
Pengesë e rëndë për dëshmimin e Ungjillit
në botë. Kështu janë ndarjet, që vijojnë edhe sot e kësaj dite ndërmjet të krishterëve,
për të cilat Papa Françesku u foli përfaqësuesve të organizmit ekumenik, duke i falënderuar
për shërbimin që i bëjnë kauzës së unitetit ndërmjet besimtarëve në Krishtin. E pastaj,
Papa u ndalua pikërisht tek ndarjet, që vijojnë. “Ato nuk duhen pranuar
me nënshtrim, si të ishin pjesë e pashmangshme e përvojës historike të Kishës. Nëse
të krishterët nuk duan ta dëgjojnë thirrjen për bashkim, që ua drejton Zoti, ata rrezikohen
të mos e njohin vetë Zotin dhe shëlbimin, që na e dhuroi përmes Korpit të Tij, Kishës”. Marrëdhëniet
ndërmjet Kishës Katolike dhe Këshillit Ekumenik të Kishave, kujtoi Ati i Shenjtë,
nisën të thellohen duke nisur nga Koncili II i Vatikanit e, duke kapërcyer moskuptimet
reciproke, arritën në një bashkëpunim të sinqertë ekumenik si dhe në shkëmbimin e
shumë dhuratave ndërmjet bashkësive të ndryshme: “Rruga drejt bashkimit të
plotë e të dukshëm, edhe sot duket e përpjetë e thepisur. Por Shpirti i Zotit na fton
të mos kemi frikë, të ecim përpara me besim e të mos kënaqemi me hapat, që mundëm
të bëjmë këto dhjetvjeçarë”. Themelore, në këtë shtegtim, është lutja,
theksoi Papa: “Vetëm me frymën e lutjes së përvuajtur e ngulmuese,
mund të kemi largpamësinë e duhur, gjykimin dhe motivet për t’ia ofruar shërbimin
tonë familjes njerëzore në të gjitha ligështitë dhe nevojat e saj, si shpirtërore,
ashtu edhe materiale”. Në përfundim Papa uroi që në takimin ndërmjet delegacionit
të Wcc dhe Këshillit Papnor për nxitjen e bashkimit të të krishterëve, të gjindet
rruga më e drejtë për të ecur me siguri drejt bashkimit të plotë.