Patriarkati ekumenik: takim i Primatëve ortodoksë, në praninë e Moskës
Që dje e deri më 9 mars, në Stamboll, janë mbledhur Primatët e Kishave ortodokse,
të thirrur nga Patriarku i Kostandinopojës, Bartolomeu, për të programuar së bashku
realizimin e një Koncili të Madh panortodoks. Ngjarja është me rëndësi të veçantë,
sepse në këtë koncil, patriarkët duhet të vendosin për disa çështje si shpallja e
një kishe autoqefale, apo paria ndërmjet Kishave të ndryshme ortodokse. Duhet të caktojnë
edhe një mënyrë të përbashkët për marrjen e vendimeve, që mund të parashikojë ose
jo konsensusin e shumicës absolute. Merr pjesë në këtë takim, në Fanar, edhe një
delegacion rus, i kryesuar nga Mitropoliti Hilarion, kreu i Deparatamentit për marrëdhëniet
e jashtme në Patriarkatin e Moskës. Dje u trajtuan tema të ndryshme si dialogu ekumenik
me Kishën Katolike, gjendja e të krishterëve në Lindjen e Mesme, varfëria në botë
dhe procedura e mbledhjes së Koncilit të ardhshëm të madh të Kishës Ortodokse, i cili
po përgatitet që prej 50 vjetësh. Mitropoliti rus, Hilarion, duke kritikuar këtë
gjendje, kërkoi të shkurtohen afatet dhe të krijohet një mekanizëm për të vendosur
ditën, rregullat e Koncilit, pjesëmarrësit e mënyrën e përfaqësimit të Kishave të
ndryshme, si edhe mënyrën e marrjes së vendimeve. Për përfaqësuesin e Patriarkatit
të Moskës, problemi kryesor në botën ortodokse janë të krishterët e Lindjes së Mesme.
Pas “pranverave arabe” e përmbysjes së regjimeve, gjendja ka kaluar në kaos. Forcat
ekstremiste sulmojnë të krishterët, sekuestrojnë priftërinj, peshkopë e murgesha dhe
shkatërrojnë kishat. “E gjithë kjo tragjedi – denoncoi Hilarion – po luhet nën
sytë tanë. E shpesh mediat heshtin. Ne, si përfaqësues të Kishave ortodokse vendase,
duhet të bëjmë ç’është e mundur për të tërhequr vëmendjen e bashkësisë ndërkonmbëtare,
për t’u solidarizuar me vëllezërit e motrat tona të persekutuara, që genocidi kundër
të krishterëve në Lindjen e Mesme të ndalet, pengjet të lirohen e të ikurit të kthehen
në shtëpitë e tyre”. Patriarkati i Moskës i shprehu solidaritet të veçantë Kishës
së Antiokisë, duke kërkuar lirimin e dy peshkopëve të marrë peng vitin e kaluar.