Papa Françesku: nuk ka stil të krishterë, pa Kryqin e pa Jezusin
Përvuajtëri, butësi, bujari: ky është stili i të krishterit, tha sot Papa Françesku
në meshën e mëngjesit, në Shtëpinë e Shën Martës. Por, është udhë që
kalon përmes Kryqit, siç ndodhi për Jezusin e, pavarësisht nga kjo, sjell gëzim. Në
Ungjillin e sotëm, Jezusi u thotë dishepujve: “Nëse ndokush dëshiron të vijë pas meje,
ta mohojë vetveten, ta marrë kryqin e vet çdo ditë dhe të më ndjekë”. Ky, nënvizoi
Papa, është stili i krishterë, sepse Jezusi, i pari, e ka përshkuar këtë udhë: “Ne
nuk mund ta mendojmë jetën e krishterë jashtë kësaj udhe. Gjithnjë ekziston kjo udhë,
që Jezusi e përshkoi i pari: udha e përvuajtërisë, udha, edhe e poshtërimit, e mohimit
të vetvetes, për t’u ringjallur më pas. Kjo është rruga! Stili i krishterë, pa Kryqin,
nuk është i krishterë, e nëse Kryqi është pa Jezusin, nuk është i krishterë. Sipas
stilit të krishterë, marrim Kryqin e Jezusit dhe ecim përpara. Jo pa Kryqin, jo pa
Jezusin”. Jezusi na dha shembullin e Tij, vazhdoi Papa, e, megjithëse ishte
i njëgjëjtë me Zotin, mohoi vetveten dhe u bë shërbëtor për të gjithë ne: “Ky
stil do të na shpëtojë, do të na japë gëzim e do të na bëjë të frytshëm, sepse udha
e mohimit të vetvetes shërben për të dhuruar jetën, është kundër udhës së egoizmit,
kundër lidhjes me pasuritë vetjake… Kjo udhë është e hapur për të tjerët, sepse ajo
është rruga e përshkuar nga Jezusi, udha e vetëmohimit, udhë për të dhuruar jetën.
Stili i krishterë është i përvuajtur, i butë, i përultë”. “Kush do ta shpëtojë
jetën e vet, do ta humbë”, u thotë Jezusi dishepujve, “sepse nëse kokrra e grurit
nuk vdes, nuk mund të japë fryte”. Papa shpjegoi se, pavarësisht se duket kontradiktore,
kjo “humbje e jetës për ta fituar” më pas, sjell gëzim e këtë gëzim na e jep vetë
Jezusi. Ky është stili i Tij e të krishterët duhet ta ndjekin, ashtu si mundin, me
bujari. Egoizmi, vërejti Ati i Shenjtë, na nxit të dukemi të rëndësishëm para të tjerëve.
Ndërsa, libri “Të përngjamët e Krishtit” na jep një këshillë, citoi Papa tekstin më
të përhapur në botën e krishterë, pas Biblës: “Dëshiro që mos të të njohin aspak e
të të gjykojnë si asgjë”. Kjo është përvuajtëria e krishterë, theksoi Ati i Shenjtë: “Ky
është gëzimi ynë, këto janë frytet tona: të shkojmë me Jezusin. Gëzimet e tjera nuk
japin fryte… Vetëm mendojnë – siç thotë Zoti – të fitojnë botën mbarë, por në fund,
humbasin dhe e shkatërrojnë jetën. Në fillim të Kreshmëve, t’i lutemi Hyjit të na
e mësojë pak këtë stil të krishterë shërbimi, gëzimi, vetëmohimi, që sjell fryte bashkë
me Të, ashtu si do Ai”.