Հայր Գրիգոր վրդ. Պատիշահ արժանացաւ Ընտանիքի աստուածաբանութեան մասին համալսարանական
վկայականին։
Հայր Գրիգոր վրդ. Պատիշահ, Հռոմի Լեւոնեան վարժարանի փոխ տեսուչ, անցեալ 26 փտրուար 2014-ին
աւարտաճառը պաշտպանելով, բարձրագոյն նիշով արժանացաւ ընտանիքի աստուածաբանութեան մասին
վկայականին (լիսանս), Հռոմի Լատերանեան համալսարանի Յովհաննէս Պօղոս Բ. քահանայապետական
հաստատութեան ամուսնութեան եւ ընտանիքի մասին ուսումնասիրութիւններու բաժնի կողմէ։ Ան
որպէս նիւթ ընտրած է ''լիբանանեան ընտանիքը, ընկերատնտեսական իրավիճակը եւ հովուական
հեռանկարներ'': Յայտնենք որ Հայր Գրիգոր Պատիշահ, Ռատիովատիկանի հայկական բաժնի յայտագիրի
ծիրէն ներս, ամէն ուրբաթ օր, կը ներկայացնէ Ընտանիքի նուիրուած հաղորդաշար մը, առ ի
պատրաստութիւն Ընտանիքի մասին յառաջիկայ հոկտեմբերին Վատիկանի մէջ գումարուելիք եպիսկոպոսական
սիւնհոդոսին։ Ռատիովատիկանի Հայկական բաժնի անձնակազմը սրտանց կը շնորհաւորէ Հայր
Գրիգոր վրդ. Պատիշահը անոր մաղթելով միշտ աւելի փայլուն ապագայ եւ պտղաբեր առաքելութիւն։