E Mërkura e Përhime: Papa kryeson procesionin dhe Meshën në Aventin
Papa Françesku do të shkojë, në orën 16.30, në Kishën e Shën Anselmit, në Aventin,
për Stacionin kreshmor dhe procesionin pendestar drejt Bazilikës së Shën Sabinës.
Atje, në orën 17.00, do të kremtojë Meshën Shenjte me ritin e bekimit të hirit dhe
të përhimjes. Në përfundim të kremtimit eukaristik, në Kurien e Përgjithshme aty pranë,
Papa do të takohet me bashkësinë rregulltare të Domenikanëve.Në orën 19.00, rikthimi
në Vatikan. Radio Vatikani do ta ndjekë kronikën e të dyja ngjarjeve, duke nisur
nga ora 16.20. Tradita e stacioneve kreshmore romake, shumë e lashtë, kremtohet
çdo vit në një nga bazilikat ku ruhen reliket e martirëve, që përbëjnë themelet e
Kishës së Romës e që, pavarësisht nga kalimi i viteve, nuk i humbasin kurrë vlerat.
Kujtohen, kështu, ata që e dëshmuan Krishtin duke derdhur gjakun e tyre për Të, kujtesë
që e nxit çdo të krishterë të përtërijë lidhjen e tij me Ungjillin.Natyrisht në qendër
të kremtimit është riti simbolik i kësaj dite, përhimja, dhe fjalët që e shoqërojnë.
Rijehon, prandaj, në të gjitha kishat e botës, ftesa për t’u kthyer në rrugën e Zotit
e për t’i besuar Ungjillit, gjë që na nxit t’ia hapim gjithnjë shpirtin fuqisë së
hirit hyjnor.