“Մեծ Ութնեակի” եօթը երկիրները Ռուսիոյ դէմ յայտարարութիւն ընդունած են
“Մեծ Ութնեակի” 7 երկիրները համատեղ յայտարարութեամբ քննադատած են Ուքրանիոյ հարցով Ռուսիոյ
որդեգրած դիրքորոշումը եւ յայտարարած են, որ կը դադրեցնեն Յունիսին Սոչիի մէջ կայանալիք
“Մեծ ութնեակի” նախապատրաստական աշխատանքները: Յայտարարութեան տակ ստորագրած են Միացեալ
Նահանգները, Գանատան, Ֆրանսան, Գերմանիան, Իտալիան, Ճաբոնը եւ Մեծ Բրիտանիան, ինչպէս
նաեւ Եւրոպայի խորհուրդը եւ Եւրոպական յանձնաժողովը: Նախապէս իր բողոքը յայտնած էր
նաեւ ՆԱԹՕ-ի գլխաւոր քարտուղար Անտերս Ֆոկ Ռասմուսենը: Ան կոչ ըրած էր Պաշտօնական Մոսկուային`
դադրեցնել ռազմական գործողութիւնները եւ սպառնալիքները: Իսկ Միացեալ Նահանգներու ղեկավարին
հետ ունեցած հեռախօսազրոյցէն ետք նախագահ Վլատիմիր Փութին խօսած է նաեւ Գերմանիոյ վարչապետ
Անկելա Մերքելի հետ: Քրեմլի տարածած հաղորդագրութեան մէջ նշուած է, որ Փութին ըսած է`
Ռուսաստանի ձեռնարկած միջոցառումները հաւասար են Ուքրանիոյ մէջ տիրող արտակարգ իրավիճակին: Գերմանիոյ
վարչապետը իր մտահոգութիւնը յայտնած է Ուքրանիոյ մէջ արձանագրուած վերջին զարգացումներու
առնչութեամբ: Փութին եւ Մերքել պայմանաւորուած են շարունակել խորհրդակցութիւնները` Ուքրանիոյ
իրավիճակի կարգաւորման համար: