Միացեալ Նահանգներու արտաքին գործոց նախարար Ճոն Քերրի զգուշացուց, որ Ռուսիա Ուքրանիոյ
տագնապին պատճառով կրնայ Ութերու խմբակէն վտարուիլ: Անդրադառնալով յունիսին Սոչիի մէջ
նախատեսուած Ութերու խմբակի վեհաժողովին` ան ըսաւ, որ Ռուսիոյ նախագահ Վլատիմիր Փութին
«Սոչիի մէջ Ութերու խմբակի ժողով մը պիտի չունենայ, ան նոյնիսկ Ութերու խմբակի անդամ
կրնայ չմնալ, եթէ այս ընթացքը շարունակուի»: «Ան կրնայ ինքզինք գտնել ռուսական առեւտուրին
վերաբերող պահ դրուած գումարներու սառեցման դէմ յանդիման: Ամերիկեան առեւտուրները կրնան
կրճատուիլ, ռուբլիի յաւելեալ անկում կրնայ տեղի ունենալ: 21-րդ դարուն չես կրնար 19-րդ
դարու ձեւով վարուելով` կատարելապէս շինծու պատճառաբանութեան հիմամբ այլ երկիր ներխուժել»,
ըսաւ Քերրի: Միացեալ Նահանգներ, Ֆրանսա, Բրիտանիա եւ Քանատա առկախեցին Սոչիի վեհաժողովի
պատրաստութիւնները: ՕԹԱՆ արտակարգ նիստեր կը գումարէ: ՕԹԱՆ-ի ընդհանուր քարտուղար
Անտերս ֆոկ Ռասմուսեն յայտնեց, որ Ռուսիոյ արարքները «Եւրոպայի խաղաղութիւնն ու ապահովութիւնը»
կը վտանգեն: Միացեալ Նահանգներու նախագահ Պարաք Օպամա ռուսական զօրքերուն շարժումները
«Ուքրանիոյ գերիշխանութեան բռնաբարում» կոչեց: Ան 90 վայրկեան տեւողութեամբ հեռաձայնային
հաղորդակցութեան մը ընթացքին Փութինի կոչ ուղղեց ռուսական զօրքերը Խրիմի մէջ գտնուող
իրենց զօրակայանները վերադարձնելու: Փութին պատասխանեց, որ Մոսկուա իրեն կը վերապահէ
Ուքրանիոյ մէջ իր եւ ռուսախօսներու շահերը պաշտպանելու իրաւունքը: Սպիտակ տունը յայտնեց,
որ Օպամա Փութինին յայտնած է, որ վերջինս իր մտահոգութիւնները պէտք է լուծէ «խաղաղ միջոցներով»`
ուքրանական կառավարութեան հետ «ուղղակի կապ հաստատելով» եւ միջազգային միջնորդական մարմիններու
միջոցով: Ան ըսած է, որ Փութինի արարքները «խախտումներ են միջազգային օրէնքի, ներառեալ`
ՄԱԿ-ի ուխտի եւ Ուքրանիոյ հետ ռազմակայաններու շուրջ 1997-ին գոյացած համաձայնութեան
հիմամբ իր յանձնառութիւններուն»: Քրեմլին յայտնեց, որ Օպամայի հետ իր հեռաձայնային
հաղորդակցութեան ընթացքին Փութին «ընդգծեց, որ ուքրանական հողամասերուն վրայ ռուս քաղաքացիներու
եւ հայրենակիցներու կեանքի եւ առողջութեան իսկական սպառնալիքներ գոյութիւն ունին»: Փութին
շաբաթ օր Ուքրանիոյ մէջ արտակարգ կացութեան եւ ռուս քաղաքացիներու կեանքերուն վտանգուած
ըլլալուն հարցով Տումային ներկայացուցած էր բանակը օգտագործելու դիմում մը: Խրիմի
վարչապետ Սերկէյ Աքսենով շաբաթ օր Ռուսիայէն խնդրեց ապահովութեան պահպանման օժանդակել:
Քրեմլին պատասխանեց, որ Ռուսիա միջամտելու եւ օժանդակելու Աքսենովի դիմումը պիտի չանտեսէ: Ռուս
զինուորներ կը շարունակեն գրաւուած պահել Խրիմի մէջ գտնուող կարեւոր վայրեր, ներառեալ`
օդակայաններ եւ հաղորդակցութեան կեդրոններ: Ուքրանիոյ ազգային ապահովութեան պատասխանատուներ
երէկ յայտարարեցին, որ ուքրանական զինեալ ուժերը պատրաստ վիճակի մէջ պիտի դրուին, պահեստի
զինուորները պիտի զինուորագրուին եւ մարզուին: Ուքրանիոյ արտաքին գործոց նախարարը երկրին
ապահովութիւնը երաշխաւորելու դիմում պիտի ներկայացնէ Միացեալ Նահանգներու եւ Բրիտանիոյ,
կարեւոր վայրերու, ներառեալ` հիւլէական կայաններու մէջ ապահովութիւնը պիտի ամրապնդուի,
ինչպէս նաեւ Ուքրանիոյ օդային տարածքը բոլոր ոչ քաղաքային թռիչքներուն դիմաց պիտի փակուի: Մինչ
այդ, Ուքրանիա եզերապահ իր նաւերը հեռացուց Խրիմի մէջ գտնուող երկու նաւահանգիստներէ
եւ զանոնք Սեւ Ծովուն ու Ազովի ծովուն մէջ այլ զօրակայաններ փոխադրեց: Խրիմի մայրաքաղաք
Սիմֆերոփոլի հարաւը գտնուող Փերեվլանոյէի մէջ գտնուող ուքրանական բանակի մէկ զօրակայանը
պաշարուեցաւ ռուսական զօրքերու կողմէ, իսկ Սեպասթոփոլի մէջ այլ զօրակայան մը` ռուսամէտ
«ինքնապաշտպանութեան ջոկատներու» կողմէ: Արեւելեան Ֆէոտոսիա նաւահանգիստին մէջ խումբ
մը ուքրանացի նաւազներ եւս իրենց զօրակայանին մէջ բանտարկուեցան: Զօրակայանը պաշարած
զինեալները շրջանի նոր ռուսամէտ իշխանութեանց հաւատարիմ են: Ըստ «Պի.Պի.Սի.»-ի, Խրիմի
հիւսիսը գտնուող Արմիանսքի մէջ Խրիմը Ուքրանիոյ միացնող կէտին վրայ ռուս զինուորներ կը
թուին խրամատներ փորել: Միւս կողմէ, «Ռոյթըրզ» լրատու գործակալութիւնը հաղորդեց, որ
«Կազփրոմ» ընկերութիւնը յայտնած է, որ կրնայ նախկին պարտքերու կուտակման պատճառով Ուքրանիոյ
կազի մատակարարումը ընդհատել: