Папа адкрыў для наведвальнікаў сады сваёй рэзідэнцыі
З 1 сакавіка 2014
г. пілігрымы і турысты змогуць перакрочыць парог папскай рэзідэнцыі ў Кастэль-Гандольфа,
каб наведаць мясцовыя сады, якія да гэтага часу былі закрыты для шырокай публікі.
Такое рашэнне прыняў сам Святы Айцец Францішак. У 2013 г. ён адмовіўся праводзіць
летні адпачынак у Кастэль-Гандольфа, як часта рабілі яго папярэднікі. Гэта рэзідэнцыя
належыць Рымскім Пантыфікам з XVII ст. і ахоплівае тэрыторыю амаль у 55 гектараў.
Першым з аб’ектаў, адкрытых для наведвальнікаў, стаў сад Барберыні, на тэрыторыі якога
знаходзяцца ўнікальныя кветкавыя алеі, дрэвы і кустарнікі, плошчы, скульптуры і археалагічныя
аб’екты эпохі імператара Даміцыяна, а таксама тэрасы, з якіх адкрываецца цудоўная
панарама на рэгіён Лацыё, аж да блакітнай лініі марскога гарызонту. Для многіх Пантыфікаў,
гэта было месца адпачынку і малітвы. Дырэктар Ватыканскіх музеяў Антоніа Паолучы назваў
адкрыццё папскіх садоў у Кастэль-Гандольфа для публікі “цудоўным падарункам папы Францішка”
з нагоды пачатку вясны 2014 года.
Наведванне саду Барберыні магчыма толькі
ў суправаджэнні экскурсавода. Прадугледжана абавязковая папярэдняя рэгістрацыя наведвальнікаў
праз інтэрнэт. Працягласць візіту складае 90 хвілін, а кошт білета – 26 еўра. Больш
падрабязную інфармацыю можна атрымаць на сайце Ватыканскіх музеяў www.museivaticani.va