Былы сакратар Яна XXIII атрымаў атрыбуты кардынальскай годнасці
Апошні з шаснаццаці
новапрызначаных Пантыфікам кардыналаў, былы асабісты сакратар папы Яна ХХІІІ, Лорыс
Франчэска Капавіла атрымаў пурпурны берэт і пярсцёнак – сімвалы кардынальскай годнасці.
Цырымонія прайшла на радзіме “Добрага Папы” – у мястэчку Сотта-іль-Монтэ, на поўначы
Італіі, а ўзначаліў яе, ад імя Святога Айца, кардынал Анджэла Садана, дэкан Калегіі
кардыналаў. Кардынал Лорыс Франчэска Капавіла па прычыне слабога здароўя не змог прысутнічаць
на кансісторыі ў Ватыкане 22 лютага 2014 г., падчас якога адбылося ўручэнне атрыбутаў
кардынальскай годнасці іншым іерархам.
Звяртаючыся да сабраных 98-гадовы кардынал
папрасіў падзякаваць Святому Айцу за давер і падкрэсліў, што кардынальская годнасць
для яго не з’яўляецца сімвалам узвышэння ці пашаны, але, перш за ўсё, паслухмянасці.
Кардынал Капавіла адзначыў, што шляхам да святасці заўсёды лічыў не самасцвярджэнне,
а імкненне да праўды, справядлівасці і любові.