Հովանաւորութեամբ Հայ կաթողիկէ պատրիարքական Պէյրութի թեմի ընդհանուր փոխանորդ, Զմմառու
վանքի մեծաւոր Գաբրիէլ Թ. Ծ. վրդ. Մուրատեանի եւ նախաձեռնութեամբ Զմմառեան միութեան ժառանգաւորաց
տեսչութեան, երէկ` կիրակի, 2 մարտ 2014-ի յետմիջօրէի ժամը 5:00-ին, Զմմառեան միաբանութեան
Վերափոխման Ս. Կուսին եկեղեցւոյ մէջ, երանելի Իգնատիոս Մալոյեան Ժառանգաւորաց սաներուն
կազմակերպութեամբ նշուեցաւ «Հայոց լեզուի օր»-ը: Ձեռնարկը սկսաւ ժառանգաւորներուն
հնչեցուցած Տէրունական աղօթքով: Բացման խօսքը արտասանեց օրուան հանդիսավար կիսասարկաւագ
Պարգեւ Պաշխընճի: Ան ներկայացուց Հայաստանի Հանրապետութեան Ազգային ժողովի կրթութեան,
գիտութեան, մշակոյթի եւ երիտասարդութեան հարցերու մնայուն յանձնախումբին նախաձեռնութեամբ
2005-ին տրուած որոշումը, որուն հիմամբ 21 փետրուարը պետական տօնացոյցին մէջ հաստատուեցաւ
իբրեւ «Մայրենի լեզուի օր»: Ան աւելցուց, որ հայապահպանութեան հնմնախնդիրին լուծման
եւ ազգային ինքնութեան ամրապնդման ի խնդիր, Զմմառեան միաբանութեան ժառանգաւորները եւս`
իբրեւ մաս սփիւռքի մէջ գործող կարեւոր կրթօճախներէն մէկուն, ընդառաջելով Հայաստանի Հանրապետութեան
սփիւռքի նախարարութեան կոչին, կազմակերպեցին այս ձեռնարկը: Այնուհետեւ ժառանգաւորաց
փոխտեսուչ հայր Մաշտոց վրդ. Զահթերեան կարդաց Հայաստանի Հանրապետութեան սփիւռքի նախարար
Հրանուշ Յակոբեանի ուղերձը, ուղղուած` ընդհանրապէս սոյն ձեռնարկը կազմակերպրողներուն
եւ մասնաւորապէս լիբանանահայութեան: Ժառանգաւորներն ու նորընծաները հերթաբար ներկայացուցին
մայրենի լեզուին նուիրուած քերթուածներու փունջ մը: Նայիրի Զարեանի «Հայոց լեզու»-ն ասմունքեցին
Վարդան Ճալլաֆն ու Լեւոն Ստեփանը, Սիլվա Կապուտիկեանի «Խօսք իմ որդուն»-ը` Յովիկ Գոյունեանն
ու Հրակ Վահրատեանը, սրինգի վրայ «Յորժամ»-ը նուագեց Յովհաննէս Չագըրեան, Խաչիկ Դաշտենցի
«Մեսրոպ Մաշտոցին»-ը` Քրիստ Միքայէլ, իսկ նորընծաներուն անունով հայոց լեզուի շուրջ մտորումներ
ներկայացուց Սարգիս Մարաշլեան: Օրուան բանախօս Տիգրան կիս. սրկ. Փիլիպպոս անդրադարձաւ
գաղթօճախներու մէջ առկայ ուծացման վտանգին եւ զայն կանխարգիլելու ուղիներ փնտռելու կարեւորութեան
մասին: «Եկէք մայրենիին նուիրուած այս տօնակատարութիւնը վերածենք ամէնօրեայ մնայուն տօնի,
շարունակ հայերէն խօսելով մեր մայրենին դարձնենք առաւել արդիական եւ առաւել կենսունակ»,
ըսաւ Տիգրան կիս. սրկ. Փիլիպպոս: Ժառանգաւորները հայոց լեզուին նուիրուած երգերու
փունջ մը հնչեցուցին` ղեկավարութեամբ Ժառանգաւորաց փոխտեսուչ Մաշտոց վրդ. Զահթերեանի,
երգեհոնի ընկերակցութեամբ Մանուէլ Քէշիշեանի: Սիամանթոյի «Գիւտին փառքը» ասմունքեց Ժաք
Քէշիշեան` ֆլիւթի ընկերակցութեամբ Յովհաննէս Չագըրեանի: Ցուցադրուեցաւ տեսերիզ մը` Զմմառու
վանքին կարգ մը հայատառ մատեանները ներկայացնող: Օրուան պատգամը փոխանցեց երանելի
Իգնատիոս Մալոյեան Ժառանգաւորաց եւ Ս. Միքայէլ ընծայարանի տեսուչ Բարսեղ վրդ. Պաղտասարեան:
«Ազգային նկարագիրի կարեւորագոյն բաղադրիչը հանդիսացող հայոց լեզուն, սփիւռքի պահպանութեան
ամէնէն էական կռուանն է: Մօր կաթին հետ մատուցուող եւ մօր կաթին չափ կենսական այս գործօնը,
անհատնում աղբիւր է հայ ժողովուրդի պահպանութեան ու անոր բարգաւաճմանը», ըսաւ տեսուչ
հայր սուրբը եւ վեր առաւ այն գաղափարը, որ հայապահպանութեան ուղղութեամբ տարուած իւրաքանչիւր
գործ արժանի է խրախուսանքի` աւելցնելով. «Մայրենիին տէր կանգնիլ չի նշանակեր զայն խնամքով
մեր տան կամ աշխատանքային վայրերու գրադարաններու մէջ պահել եւ օտարներուն առջեւ հպարտանալ
Մեսրոպեան տառերու հանճարեղ գեղագիտական ու ոճային ինքնատիպ լուծումներով: Մայրենիին
տէր կանգնիլ կը նշանակէ` իւրացնել զայն իր բոլոր նրբերանգներով ու ելեւէջներով տէր կանգնիլ
կը նշանակէ անարատ ու անբիծ ձեւով զայն սերունդներու ժառանգութիւն դարձնել, որպէսզի անոնք
եւս զգան իրենց լեզուի քաղցրութիւնն ու ջերմութիւնը»: Այնուհետեւ Լիբանանի մէջ Հայաստանի
Հանրապետութեան արտակարգ եւ լիազօր դեսպան Աշոտ Քոչարեան ներկայացուց հայոց լեզուի օրուան
ստեղծման հանգամանքները: Իր խօսքի աւարտին դեսպան Քոչարեան շնորհակալութիւն յայտնեց ձեռնարկը
կազմակերպողներուն` ըսելով. «Իրարու շնորհաւորենք այսօր մայրենի լեզուի նուիրուած պետական
տօնին առիթով եւ մեծարենք ու փառաբանենք մեր մեծասքանչ մայրենին` ամէնուրեք խօսելով հայերէն: Աւարտին
Զմմառու վանքի մեծաւոր Գաբրիէլ Թ. Ծ. վրդ. Մուրատեան եւ Ժառանգաւորաց տեսուչ Բարսեղ վրդ.
Պաղտասարեան ընծայարանի 50-ամեակի յուշանուէրով պարգեւատրեցին դեսպան Աշոտ Քոչարեանը:
Գերապայծառ Մուրատեան վեր առաւ մայրենիին զարկ տալու գաղափարը եւ հայրենիքի մէջ Զմմառեան
միաբանութեան գրանցման հարցը, ապա պահպանիչով եզրափակեց մայրենիին նուիրուած տօնակատարութիւնը: