Dramatike, letra që ipeshkvi i Odesa-Simferopolit, imzot Bronislav Biernacki, i drejton
gjithë botës. “Ndërsa bota mbarë po e shikon me ankth të madh gjendjen në Ukrainë
- shkruan ipeshkvi - edhe Kisha Katolike është thellësisht e shqetësuar për zhvillimin
e ngjarjeve në vendin tonë, i cili tani, është një hap larg luftës së hapur, që mund
të përfshijë një zonë edhe më të madhe në rajon. Duke qenë ipeshkëv i dioqezës së
Odesa-Simferopolit, një pjesë e së cilës ndodhet në Republikën Autonome të Krimesë,
më duhet të shpreh trishtimin tim të madh për ç’po ndodh në dioqezë. Si katolikë,
kërkojmë paqe e dialog. E kuptojmë se çdo komb ka të drejtë të vetëvendosë për të
ardhmen e vet. E kuptojmë se të gjitha ndryshimet politike duhet të bëhen pa ndikime
nga jashtë. Por duke parë se ky rregull ndërkombëtar veprimi nuk respektohet, u bëjmë
thirrje të gjitha kombeve të botës të punojnë së bashku me Ukrainën për të na ndihmuar
të rikthejmë paqen e mirëkuptimin ndërmjet palëve në konflikt”. Ipeshkvi u kërkon
të gjithëve t’i luten Zotit të paqes, që Ai i Lumi të ketë mëshirë për ukrainasit
e t’u japë pajtimin e dëshiruar.