Papa me ipeshkvijtë spanjollë: familja
e krishterë është ungjillëzuese e çmueshme
“Një Kishë “përherë misionare”,
sepse Ungjilli duhet kumtuar me guxim e pa ndërprerje. Këtë u kërkon Papa ipeshkvijve
spanjollë, të cilët i priti sot paradite, në vizitën ad Limina. Papa ua dorëzoi fjalimin
ipeshkvijve dhe u shprehu urimet për asamblenë plenare që konferencës ipeshkvore spanjolle,
që do të mbahet javën e ardhshme. Ipeshkvi
të mos ndjehet vetëm, as të mos mendojë se është vetëm, e, mbi të gjitha, të mos harrojë
kurrë se “grigja, që i është besuar, është e ndjeshme ndaj gjërave të Hyjit”. Drejt
kësaj vetëdijeje i orienton Papa ipeshkvijtë spanjollë, bij të një tokë – vëren në
fillim të fjalimit – që ka nxjerrë shenjtër të mëdhenj, ndërsa tani vuan nga “indiferenca
e shumë të pagëzuarve”, që janë “bij të një kulture mondane, e cila e mbyll Hyjin
në jetën private dhe e përjashton nga rrafshi publik”. Por këtu, thekson Papa, gjendet
forca e Shpirtit të Shenjtë, që vijon të mbjellë hiret e veta. Juve ipeshkvijve, shkruan
Ati i Shenjtë, “ju besohet detyra t’i bëni të mbijnë
këto fara, duke shpallur me guxim e vërtetësi Ungjillin; të ndiqni me vëmendje rritjen
e tyre, duke dhënë shembullin tuaj, duke edukuar dhe duke u gjetur pranë; dhe t’i
harmonizoni brenda tërësisë së ‘vreshtit të Zotit’ nga i cili askush nuk mund të përjashtohet”. Si gjithmonë në këtë lloj takimesh, vështrimi
i Papës përfshin tërë realitetin kombëtar dhe kishtar të një vendi. Prandaj, shkruan
Papa, duhet të jeni të aftë “t’i dëgjoni të gjithë me
ëmbëlsi e mëshirë dhe të kërkoni çfarë me të vërtetë sjell bashkim dhe shërben për
rritjen e ndërsjellë”. Në një kohë kur “vështirësitë për përçimin e fesë nuk mungojnë”,
Papa Françesku i nxit ipeshkvijtë spanjollë t’i vënë bashkësitë e tyre kishtare në
një “gjendje të përhershme misioni”, duke u kujdesur për të largëtit dhe për të vegjlit.
Një vëmendje e veçantë i duhet kushtuar hyrjes në jetën e krishterë, duke mbajtur
parasysh se feja “nuk është vetëm trashëgimi kulturore”, por "dhuratë, që lind nga
takimi personal me Jezusin”. Papa
Françesku u kërkon ipeshkvijve t’u rrinë afër meshtarëve, seminaristëve – për të cilët
uron të gjenden ‘formatorë të mirë’ dhe ‘profesorë kompetentë’ – dhe veçanërisht familjeve.
“Një familje e ungjillëzuar – pohon Papa – është një burim i çmueshëm i ungjillëzimit,
mbi të gjitha sepse rrezaton mrekullitë që Hyji ka bërë brenda saj. Për më tepër,
duke qenë nga natyra vendi i bujarisë, do të ngjallë lindjen e thirrjeve për të ndjekur
Zotin në meshtari dhe në jetën rregulltare” - përfundon Ati i Shenjtë.