Papa Françesku: të lutemi që Zoti të na dërgojë priftërinj e murgesha, të lirë nga
idhujtaria e kotësisë, pushtetit, parasë
Ta lusim Zotin për thirrje. Ta lusim të na dërgojë priftërinj e murgesha, që ia kushtojnë
vetëm Atij zemrën, të lirë nga idhujtaria e kotësisë, pushtetit, parasë. Është ftesa
e Papës sot, gjatë Meshës, kremtuar në Shtëpinë e Shën Martës.
Ungjilli i djaloshit
të pasur, që gjunjëzohet para Jezusit për ta pyetur ç’duhet të bëjë për të trashëguar
jetën e pasosur, ishte në qendër të homelisë së Papës Françesku. Ky i ri, nëvizoi
Papa, kishte dëshirë të zjarrtë t’i dëgjonte fjalët e Jezusit. Ishte njeri i mirë.
Që në rini të parë, kishte jetuar sipas Urdhërimeve të Tënzot. I mirë, pra, po kjo
nuk i mjaftonte: donte diçka më shumë. Shpirti i Zotit e nxiste në kërkim. Jezusi
e shikon me dashuri e i bën propozimin: “Shit gjithë ç’ke pas shpirtit, eja pas meje
e prediko Ungjillin”. Po ai, kur i dëgjoi këto fjalë, u nxi në fytyrë e iku e shkoi
shpirtngrysur, sepse kishte shumë pasuri: “Zemra e tij e shqetë, pikërisht
sepse Shpirti i Shenjtë e nxiste t’i afrohej Jezusit e ta ndiqte, ishte zemër e mbushur
plot, e ai nuk mori guximin ta zbrazë. E zgjodhi: paratë. Zgjodhi zemrën e mbushur
plot me para. Po nuk ishte hajdut, kriminel, jo, jo, jo! Ishte njeri i mirë: nuk kishte
vjedhur kurrë. Kurrë nuk kishte mashtruar kënd: paratë e tij ishin të ndershme. Por
zemrën e kishte të burgosur aty, të lidhur me paratë e nuk mund të zgjidhte lirisht.
Në vend që të zgjidhte ai, zgjodhën paratë për të”. Sa të rinj, vijoi Papa
Françesku, e ndjejnë në shpirt thirrjen për t’iu afruar Jezusit, e janë tejet entuziastë.
Nuk kanë turp të gjunjëzohen para Tij, ta dëshmojnë publikisht besimin e tyre në Krishtin.
E duan edhe ta ndjekin, por, kur e kanë zemrën plot me gjëra të tjera e nuk janë aq
guximtarë sa ta zbrazin, kthehen mbrapsht, e gëzimi i tyre shndërrohet në trishtim.
Edhe sot shumë të rinj ndjejnë thirrjen, por nganjëherë del diçka, që i pengon: “Duhet
të lutemi, që zemra e këtyre të rinjve të zbrazet. Të pastrohet nga interesat, nga
dashuritë e tjera, të bëhet zemër krejt e lirë. ‘O Zot, dërgona, motra e priftërinj,
mbroji nga idhujtaria e kotësisë, nga idhujtaria e vetëmburrjes, idhujtaria e pushtetit,
idhujtaria e parasë’. Të lutemi, që këto zemra të përgatiten për ta ndjekur nga afër
Jezusin”. I riu i Ungjillit të sotëm, pohoi Papa, njeri shumë i mirë,
bëhet shumë i mjerë. Ka shumë të rinj të tillë, sot. Prandaj duhet t’i lartojmë Zotit
një lutje të dalë nga e gjithë zemra:“Është lutja: ‘Ndihmoji, o Zot, këta të
rinj, të jenë të lirë, jo skllevër; ndihmoi ta kenë zemrën vetëm për Ty, e kështu
thirrja jote të zbresë në zemrat e tyre e të japë fryt’. E kjo është lutja për thirrje
meshtarake e rregulltare. Duhet të lutemi shumë. E të jemi gjithnjë të vëmendshëm:
thirrjet janë. Duhet t’i ndihmojmë të rriten, të lutemi, që Zoti të hyjë në këto zemra
e t’u japë gëzimin e patregueshëm e të lum, të cilin e provon çdo njeri, kur e ndjek
nga afër Jezusin”.