Сакратар Рады кардыналаў: Бэнэдыкт XVI – “новы Майсей”
“Новым Майсеем” назваў
Бэнэдыкта XVI біскуп Марчэла Сэмерара, сакратар Рады кардыналаў для дапамогі Святому
Айцу ў кіраванні Касцёлам. Папа на пенсіі, на думку італьянскага іерарха, паказаў,
што Касцёлу можна служыць не толькі выконваючы кіраўнічыя функцыі, але і праз малітву.
Ён нагадаў пра каштоўнасць і годнасць старасці і звярнуў увагу на “сэрца хрысціянства”,
якім з’яўляецца асабістая сустрэча з Хрыстом, што выклікае сапраўдную радасць. Біскуп
Альбана даў інтэрв’ю італьянскай “Avvenire” у першую гадавіну заканчэння пантыфікату
Бэнэдыкта XVI. Іерарх быў сведкам многіх гістарычных момантаў, звязаных з ім, паколькі
на тэрыторыі яго дыяцэзіі знаходзіцца летняя рэзідэнцыя Пантыфікаў у Кастэль Гандольфа.
Менавіта там адбылася апошняя публічная сустрэча Бэнэдыкта XVI з вернікамі. Біскуп
Сэмерара, узгадваючы той дзень, прызнаўся, што Пантыфік перажываў яго ў пакоры, са
спакоем.
Матывацыю жэсту Бэнэдыкта XVI, адысці па прычыне недахопу фізічных
сіл для кіравання Касцёлам, іерарх лічыць знакавай для заходняга свету, дзе штучна
хаваецца натуральнае знясіленне чалавека.
Многія па-сапраўднаму зразумелі Бэнэдыкта
XVI толькі пасля яго зыходу. Гэта лёс айца, быць зразуметым тады, калі да канца выканае
сваю місію, лічыць біскуп Сэмерара. Гэта, на яго думку, добра ўпісваецца ў дынаміку
развіцця Касцёла ў яго духоўным і душпастырскім вымярэннях.
Іерарх лічыць,
што трэба дзякаваць Бэнэдыкту XVI за тое, што кіраваў Касцёлам служачы праўдзе, і
рабіў гэта з вялікай лагоднасцю і пакорай сэрца. Менавіта такім апісвае Біблія Майсея,
пяшчотным і сціплым. Але менавіта гэты чалавек павёў за сабой людзей у вырашальны
момант гісторыі, але потым, яшчэ пры жыцці, перадаў кіраванне народам іншаму.