Վարդանանց Տօնակատարութիւն, Բարձր Հովանաւորութեամբ Տանն Կիլիկիոյ Կաթողիկէ Հայոց Հայրապետ՝
Ներսէս Պետրոս ԺԹ. Կաթողիկոս Պատրիարքին։
Չորեքշաբթի 26 Փետրուար
2014-ի Երեկոյեան, Հայ Կաթողիկէ Ս. Փրկիչ Ժողովրդապետութեան «Յովհաննէս Պօղոսեան» հանդիսասրահին
մէջ Վարդանանց Տօնակատարութիւն տեղի ունեցաւ, Բարձր Հովանաւորութեամբ Տանն Կիլիկիոյ Կաթողիկէ
Հայոց Հայրապետ՝ Ներսէս Պետրոս ԺԹ. Կաթողիկոս Պատրիարքի և Նախագահութեամբ Պէյրութի Թեմի
Պատրիարքական Ընդհանուր Փոխանորդ և Մեծաւոր Զմմառու Վանքի՝ Գերպծ. Հ. Գաբրիէլ Թ.Ծ.Վ.
Մուրատեանի: Ոգեկոչման ներկայ էին Արհիապատիւ, Գերյարգելի և Գերապատիւ Հայրեր, Արժանապատիւ
Քահանաներ, Առաքինազարդ Քոյրեր, Զմմառու Դպրեվանքի Նորընծաներ և յարգարժան հայորդիներ:
Օրուան բանախօսն էր Գերպ. Հ. Ղազար Վրդ. Պետրոսեան, որ իր խօսքին մէջ փոխանցեց դարերու
խորքէն եկող Վարդանանց Խորհուրդը: Այս առթիւ գեղարուեստական յայտագիր մը ներկայացուեցաւ,
որու ընթացքին Մեսրոպեան և Սրբուհի Ագնէս Հայ Կաթողիկէ Վարժարաններու աշակերտները և Ս.
Մեսրոպի Արիները հայրենաշունչ երգեր երգեցին, բանաստեղծութիւններ արտասանեցին և երաժշտական
կտորներ ներկայացուցին: Տօնակատարութեան իրենց մասնակցութիւնը բերին նաեւ Զմմառու Երան.
Մալոյեան Դպրեվանքի ուսանողները շարականներու երգեցողութեամբ, ինչպէս նաեւ Բլբուլ և Արծիւեան
Երգչախումբերը ղեկավարութեամբ վաստակաւոր Մաէսթրօ՝ Տիար Մանուէլ Քէշեշեանի: Հանդիսութեան
աւարտին՝ փակման խօսքով ելոյթ ունեցաւ Պէյրութի Թեմի Պատրիարքական Ընդհանուր Փոխանորդ
և Զմմառու Վանքի Մեծաւոր ՝ Գերպծ. Հ. Գաբրիէլ Թ.Ծ. Վ. Մուրատեան, որ ներկաներուն իր սրտի
խօսքը փոխանցեց ըսելով. «Այսօ՛ր, մեր Հայ ժողովուրդը և մեր Հայ Եկեղեցին որքա՜ն պէտք
ունին Վարդանի նման քաջարի և ազգանուէր հերոսներու, որոնք կարող ըլլան ապրիլ ու նոյնիսկ
մեռնիլ վասն Կրօնից և Հայրենեաց.....»: «Վարդանանք եթէ յաղթական ելան այս ճակատամարտէն,
պատճառը այն էր որ անոնց մէջ կրօնք և հայրենիք միացած էին իրարու. Եկեղեցի և Ազգ հոգեպէս
միաձուլուած: Մենք եւս այսօր՝ եթէ կ'ուզենք յաղթանակներ արձանագրել մեր կեանքի ընթացքին,
հարկ է որ միանանք մէկ բնաբանի տակ, կուռ համոզումով. «Հայ եմ և քրիստոնեայ»: Հայկական
այս տոհմիկ աւանդութիւնը իր աւարտին հասաւ ջերմացնելով բոլոր հանդիսականներուն հոգին
Վարդանանց խորհուրդով և իւրաքանչիւր հայորդի իր հետ տարաւ Վարդանանց այս կտակէն մասնիկ
մը, յաւերժացնելով Վարդանանց յիշատակը:
| All the contents on this site are copyrighted ©. |