Францішак: быць хрысціянамі, чые паводзіны адпавядаюць веры
Быць людзьмі, якія
думаюць, чуюць і дзейнічаюць як хрысціяне, каб не спакушаць іншых. Аб гэтай ласцы
заклікаў прасіць Бога папа Францішак раніцай 27 лютага 2014 г. Падчас Эўхарыстыі ў
капліцы Дома св. Марты Пантыфік, між іншым, удзяліў сакрамэнт канфірмацыі. “Хто прымае
гэты сакрамэнт, дэманструе сваё жаданне быць хрысціянінам. Быць хрысціянінам азначае
даваць сведчанне аб Езусе Хрысце”, - сказаў ён. Паводле Папы, чалавек можа казаць,
што з’яўляецца вернікам, але калі яго паводзіны не адпавядаюць хрысціянскаму жыццю,
ён такім не з’яўляецца. Паводле Святога Айца, гэта неадпаведнасць з’яўляецца прычынай
“скандалу” – спакушэння для многіх. Яна прыносіць шмат зла і нават забівае. Папа нагадаў
словы Езуса: “Хто спакусіць аднаго з малых гэтых, якія вераць у Мяне, таму лепш было
б, каб павесілі яму на шыю млынавы камень і кінулі яго ў мора”(Мк 9, 42).
Францішак
адзначыў, што менавіта з-за неадпаведнасці паводзінаў вернікаў з хрысціянскай верай
многія не давяраюць Касцёлу, сцвярджаючы: “Я веру ў Бога, але не ў Касцёл, таму што
вы, хрысціяне, кажаце адно, а робіце іншае”. “Уяві сабе, што знаходзішся перад атэістам,
які кажа, што не верыць у Бога. Ты можаш яму прачытаць цэлую бібліятэку, у якой гаворыцца,
што Бог існуе і нават даказаць гэта, а ён не паверыць. Але калі перад гэтым атэістам
дасі сведчанне адпаведнасці хрысціянскаму жыццю, нешта пачне працаваць у яго сэрцы.
Менавіта тваё сведчанне будзе тым, што прынясе ў яго сэрца гэту няўрымслівасць, на
якой працуе Святы Дух”, - сказаў Папа і заклікаў імкнуцца, каб наша жыццё адпавядала
таму, у што мы верым і аб чым навучаем.
Паводле Святога Айца, каб весці жыццё
па-сапраўднаму хрысціянскае трэба шмат маліцца, а калі памылімся – заўсёды прасіць
прабачэння ў Бога.