Papa për familjet: me lutjen tuaj, Kisha mund të marrë vendimet e duhura
Nevojitet lutja. E kërkon Papa Françesku, në Letrën drejtuar familjeve, në pritje
të Asamblesë së përgjithshme të jashtëzakonshme të Sinodit të Ipeshkvijve, që do të
mbahet në tetor, me temë: “Sfidat baritore për familjen në kontekstin e ungjillëzimit
të ri”. Në tekstin e botuar në festën e Paraqitjes së Jezusit në tempull, Papa kujton
se sot “Kisha është e thirrur ta kumtojë Ungjillin , duke u përballur me përparësitë
e reja baritore”, që kanë të bëjnë me familjen. Papa u drejtohet familjeve duke
u paraqitur vetë tek pragu i shtëpisë së tyre. Thotë se sinodi i ardhshëm përfshin
tërë “Popullin e Hyjit”, ipeshkvij e meshtarë, të shuguruar e laikë, nga të gjitha
Kishat vendore të botës, të cilat marrin pjesë për përgatitjen e tij “me sugjerime
konkrete dhe me ndihmën e domosdoshme të lutjes”. “Mbështetja me anë të lutjes
– shkruan Papa – është më e domosdoshme dhe kuptimplotë se kurrë”, veçanërisht nga
ato që Papa i quan “të dashurat familje”. Asambleja sinodale u kushtohet veçanërisht
familjeve, “thirrjes dhe misionit të tyre në Kishë e në shoqëri, problemeve të martesës,
të jetës familjare, të edukimit të fëmijëve dhe rolit të familjeve në misionin e Kishës”.
Ati i shenjtë, pra, bën thirrje “ta lusim shumë Shpirtin e Shenjtë, që t’u japë dritë
etërve sinodalë e t’i drejtojë në këtë detyrë të vështirë”. Lutja e familjeve për
sinodin e Ipeshkvijve do të jetë “një thesar i çmuar, që do ta pasurojë Kishën”. Kryetari
i Këshillit Papnor për Familjen, Kryeipeshkvi Vincenzo Paglia, gjatë paraqitjes së
letrës së Papës, vëren se Ati i Shenjtë synon të shpjegojë se familjet duhet të jenë
jo vetëm objekti i vëmendjes, por edhe subjekti i ecjes sinodale, “duke qenë se janë
pjesa më e madhe e Kishës”, “të shënjuara me sakramentin e martesës”. Më tej Papa
Françesku shpjegon se, pas sinodit të jashtëzakonshëm, vitin tjetër do të mblidhet
sinodi i zakonshëm, i cili, edhe ai do t’i kushtohet familjes, ndërsa në vitin 2015
do të mbahet takimi i familjeve në Filadelfia. Për këtë arsye, Papa uron që, “me anë
të këtyre ngjarjeve, Kisha të përshkojë një udhë të vërtetë përzgjedhjeje dhe të gjejë
mjetet e përshtatshme baritore, për t’i ndihmuar familjet, që t’i përballojnë sfidat
e tanishme me dritën dhe forcën që burojnë nga Ungjilli”. Duke kujtuar festën
e Paraqitjes së Jezusit në tempull, kur Zoja e Shën Jozefi, me fëmijën, takuan dy
pleqtë, Simeonin e Anën, Papa na paraqet edhe një herë “dy prindër të rinj dhe dy
njerëz të moshuar, që i mbledh Jezusi”, sepse – shkruan – “Jezusi i takon dhe i bashkon
brezat”; “Ai është burimi i pashtershëm i dashurisë që tejkalon çdo mbyllje, çdo vetmi,
çdo trishtim”. Në ecjen familjare, vëren Papa, përjetohen shumë çaste të bukura, si
vaktet dhe pushimi, puna në shtëpi dhe argëtimi, lutja dhe udhëtimet, shtegtimet,
veprat e solidaritetit. Por, “nëse mungon dashuria, mungon gëzimi, dhe dashurinë e
vërtetë na e jep Jezusi: na jep fjalën e tij, që e ndriçon udhën tonë; na jep bukën
e jetës, që na ushqen në mundin e përditshëm të ecjes sonë”. Imzot Palja thotë
se “po të mos ekzistonin familjet, fjala e Jezusit, fjala e Kishës, fjala e Papës
mbi dashurinë martesore, që është e aftë t’i hapet dashurisë së Hyjit për të gjithë,
do të ishte abstrakte”. Ja pse, përfundon kryetari i dikasterit për familjen, Papa
u kërkon ndihmë familjeve të krishtera, u kërkon “ta ndiejnë përgjegjësinë e misionit
të tyre në këtë kohë kaq të ngatërruar e të pështjelluar” dhe u thotë familjeve: “Letra
jonë jeni ju”.