Kalvari i imzot Nikë Prelës: kujtim, në tetëmbëdhjetë vjetorin e vdekjes
“Populli ynë nuk ka vrarë kurrë ndonjë armik. Do të meritonte Çmimin Nobel për paqen,
sepse vërtet nuk e di si arrin ta durojë këtë shtypje. Ndoshta, ia arrijmë, sepse
ne në Kosovë jemi të stërvitur me vuajtjet, jemi si gomari, që rrihet gjithnjë”. Këto
janë fjalët e ipeshkvit katolik shqiptar, imzot Nikë Prelës(1918-1996), një nga etërit
shpirtërorë të Kosovës, në kohën kur ajo përpiqej të arrinte qëllimet e veta pa dhunë.
Bosht i Kishës Katolike dhe udhëheqës i krejt popullit shqiptar të vendit, i cili,
pavarësisht nga vuajtja e vazhdueshme fizike e morale, mbeti në krye të Kishës deri
në minutin e fundit, duke përsëritur shpesh: “Unë vuaj shumë, por Jezusi ka vuajtur
edhe më shumë. Edhe populli im sot, vuan më shumë se unë”. E kujtojmë sot, në 18-vjetorin
e vdekjes. Imzot Prela lindi
në Kotor të Malit të Zi, i nënti ndër dhjetë vëllezër e motra, në një familje shqiptare.
E ëma, Cila, sëmurë rëndë gjatë shtatzanisë, u këshillua nga mjekët të abortonte,
por nuk pranoi, sepse feja nuk i thoshte ta mbyste jetën, që sapo kishte filluar udhën
në kraharorin e saj. Erdhi kështu në dritë Nika i vogël, i cili më vonë thoshte vetë,
me mirënjohje: “Nëna ime rrezikoi jetën për mua e më lindi. Kjo do të thotë se Zoti
i kishte disa plane”. Pas shkollës fillore, frekuentoi gjimnazin dhe vazhdoi studimet
për filozofi e teologji në Split e në Strasburg. Fillimisht familja ishte mjaft e
pasur, por pas ardhjes së komunizmit, humbi gjithçka, mbeti në rrugë, pa shtëpi, e
cila iu sekuestrua. Askush nuk donte ta shuguronte meshtar, djalin, të cilit i thoshin
shpesh: “Shqiptar, nuk të do kush”. Si seminarist e student i teologjisë në Split
i duhej të paguante takstën e qëndrimit, pavarësisht se ishte lindur në territorin
e Jugosllavisë së atëhershme. U shugurua në rrethana dramatike më 13 qershor 1941,
gjatë Luftës II Botërore, kur e vetmja siguri, siç thoshte vetë, ishte Zoti. Famullitar
në Jugosllavinë komuniste, u hodh në gjyq e u dënua tri herë. Faji i tij i vetëm:
ishte prift katolik dhe shqiptar! Një nga kryegjykatësit e atëhershëm e pati pyetur:
“A je ti ai që do më shumë Papën fashist se Titon komunist?”. Ipeshkvi i ardhshëm
iu përgjigj me guxim: “Po. Për mua, për ne katolikët, Papa është pasardhësi i Shën
Pjetrit, apostulli i parë i historisë, jo fashist siç thoni ju, por Atë e krye i Kishës…
Ne jemi gjithnjë kundër ideologjisë ateiste e komuniste, kurrë kundër njeriut, sepse
i duam armiqtë”. Fjalë, që kur iu thanë Papës Pali VI, e bënë të mallëngjehej e ta
përqafonte e falenderonte ipeshkvin e Kosovës për besnikërinë e dashurinë ndaj Kishës,
ndaj Papës e njeriut. Si prift, Nikë Prela kaloi në burg gjashtë vjet, nën tortura.
Dy herë u çua në internim, në kufi me Shqipërinë. Nga kjo anë e kufirit, akuzohej
si sipiun i Shqipërisë, nga ana tjetër, si spiun i Jugosllavisë, prandaj, s’është
për t’u çuditur që e vunë para skuadrës së ekzekutimit, së cilës i shpëtoi për trillin
e ndonjërit prej persekutuesve. Por nuk u shpëtoi vuajtjeve e torturave në burg, ku
ishte ngushëllim moral për çdo të burgosur. I mbajtur vazhdimisht nën mbikqyrje, nuk
i dhanë asnjëherë pasaportën jugosllave, derisa u bë ipeshkëv. Shugurimi i tij
ipeshkvnor mban datën 21 dhjetor 1969, ditë e ftohtë dimri në Sarajevë, ku u caktua
ndihmës për besimtarët e gjuhës shqipe në dioqezën Shkup-Prizren. Emërimi i erdhi
nga Papa Pali VI, kur Jugosllavia ishte akoma e bashkuar e shqiptarët e Kosovës pa
të drejtat, që gëzojnë sot. Me këtë gjest, Selia e Shenjtë deshi t’i jepte rëndësi
bashkësisë shqiptare, pavarësisht se Beogradi vinte gjithnjë kushte e kufizime. Megjithëse
jo nga Kosova, imzot Nikë Prela hyri thellë në shpirtin e kosovarëve dhe mori vendime,
vlera e të cilave shihet e ndjehet edhe sot e kësaj dite. Në vitin 1970, themeloi
revistën “Drita”, pikë referimi për intelektualët shqiptarë e për ata, që e kishin
për zemër zgjimin kulturor të popullit. Në vitin 1974, revista u bë edhe Shtëpi Botuese
katolike, ku mund të botonin edhe shqiptarët e diasporës. U kujdes veçanërisht për
thirrjet meshtarake, duke shuguruar shumë priftërinj, jo vetëm për dioqezën e vet,
por edhe për mision. I kujtonte gjithnjë fjalët e Nënë Terezës: “Nëse Kisha nuk ka
fryte do të thotë se nuk jeton, se nuk ka dashuri; nëse s’ka të rinj, të gatshëm t’i
kushtohen plotësisht Zotit, do të thotë se në atë Kishë, ka diçka që s’shkon”. Baritoria
e tij tregonte vemëndje të veçantë për familjet, për të varfërit. Vetëm në Ferizaj
ndërtoi shtatë shtëpi për nevojtarët e përkrahu e mbështeti çdo nismë të Karitasit
e të Shoqatës “Nënë Tereza”. Fillimisht nuk kishte marrëdhënie me bashkësinë islame,
por më pas krijoi raporte të shkëlqyera edhe me ta, duke i hapur udhën dialogut ndërfetar.
Në vitin 1981, në kohën e demonstratave të shqiptarëve, e ngriti zërin në mbrojtje
të minatorëve të Trepçës. I padëgjuar nga autoritetet jugosllave e serbe, denoncoi
ku mundi, në selitë ndërkombëtare, padrejtësitë e vrasjet në Kosovë. I shkroi Konferencës
Ipeshkvnore Evropiane, kur kryetar i saj ishte kardinali milanez Martini, por edhe
presidentit të SHBA-ve, të Kinës e të Bashkimit Sovjetik. Peshkopit ortodoks serb
Pavle i thoshte qartë: “Shkëlqesi, populli juaj, Kisha juaj po gabon rëndë”. Ishte
optimist për fatin e shqiptarëve si në Kosovë, ashtu edhe në Shqipëri dhe e përshëndeti
me lot në sy hapjen e kufijve me atdheun mëmë. Në vitin 1984, një aksident i rëndë
rrugor e la në karrocë. Ashtu, takoi më 17 tetor 1995, Papën Gjon Pali II, i cili,
duke e falenderuar për dëshminë e tij të krishterë, i pati thënë: “Kosova, plagë e
shpresë e jona!” U tërhoq nga shërbimi ipeshkvnor më 18 shkurt 1996 e ndërroi jetë
vetëm pak ditë më vonë, si sot, më 25 shkurt. Më 27 shkurt 1996, në funeralin e kremtuar
në Prizren, morën pjesë mëse 35 mijë vetë, ardhur nga Kosova, Maqedonia, Mali i Zi
e Shqipëria. Në mesin e tyre, besimtarë myslimanë e disa popë e besimtarë ortodoksë
serbë e malazezë. Dikush, me dashuri plot mirënjohje, e pati quajtur “Plaku i Kosovës”,
ndërsa për gjithë popullin imzot Nikë Prela mbeti “ipeshkvi ynë”.
(përkthyer
me shkurtime nga "Madre Teresa nel Kosovo della riconciliazione", Giancarlo Salvoldi,
Velar, 2003, f. 107-115)