Ուքրանիոյ նախագահ նշանակուած է ժամանակաւորապէս Օլեքսանտր Թուրչինովը
Շաբաթ օր Ուքրանիոյ նախագահ Վիքթոր Եանուքովիչը պաշտօնանկ ընելէ ետք, Ուքրանիոյ խորհրդարանը
երէկ որոշեց իր նախագահը` Օլեքսանտր Թուրչինովը ժամանակաւորապէս նշանակել նախագահի պաշտօնակատար: Քիեւի
եւ այլ շրջաններու մէջ աւելի քան երեք ամիս տեւած ցոյցերէ, ինչպէս նաեւ վերջին օրերու
արիւնալի բախումներէն ետք Եանուքովիչ շաբաթ օր լքած էր մայրաքաղաքը: Երէկ ուքրանացի
խորհրդարանականները նաեւ քուէարկած էին Եանուքովիչի դաշնակից, արտաքին գործոց նախարար
Լէոնիտ Քոժարան պաշտօնանկ ընելու օգտին: Նախագահի պաշտօնակատար Թուրչինով կոչ ուղղած
էր խորհրդարանի անդամներուն մինչեւ երեքշաբթի օր համաձայնութեան գալու միացեալ կառավարութեան
կազմին շուրջ:
Խորհրդարանը երէկ քուէարկած է նաեւ Եանուքովիչի նստավայրը պետութեան
յանձնելու օգտին: Եանուքովիչի գտնուելուն վայրը առայժմ անյայտ է: Հայազգի Արսէն Աւագով,
որ շաբաթ օր նշանակուած էր ներքին գործոց նախարարի պաշտօնակատար, տեղեկացուցած է, որ
սահմանապահները արգիլած են Եանուքովիչին օդանաւ նստիլ Տոնեցքի մէջ: Շաբաթ օր ազատ
արձակուեցաւ նաեւ Ուքրանիոյ նախկին վարչապետ Եուլիա Թիմոշենքօ: Ան հիմնական թեկնածու
է մայիսին տեղի ունենալիք նախագահական ընտրութեան: