Եպիսկոպոսներու Սիւնհոդոսի խորհուրդի ժողովը Վատիկանի մէջ։

24 եւ 25 փետրուարին Վատիկանի մէջ գումարուած է Եպիսկոպոսական սիւնհոդոսի նոր խորհուրդի անդրանիկ ժողովը, գլխաւորութեամբ Եպիսկոպոսական Սիւնհոդոսի ընդհանուր քարտուղար` նորանշանակ Կարտինալ Լորէնցօ Պալտիսսէրիի։ Յայտնենք որ Ֆրանչիսկոս Սրբազան Քահանայապետը, անցեալ 21 փետրուարին, նշանակեց, Ընտանիքի մասին յառաջիկայ հոկտեմբեր 2014-ին գումարուելիք սիւնհոդոսի` երեք համանախագահները յանձինս Փարիզի Արքեպիսկոպոս` Կարտինալ Անտրէ Վէն Թրուայի, Մանիլայի Արքեպիսկոպոս` Կարտինալ Լուիս Անթոնիօ Թակլէի եւ Պրազիլի Ափարեսիտայի Արքեպիսկոպոս` Կարտինալ Ռայմուտօ Տամաշէնօ Ասսիզիի։ Յայտնենք նաեւ որ Ֆրանչիսկոս Պապը հոկտեմբեր 2013-ին` նշանակած էր Սիւնհոդսի Ընդհանուր զեկուցողը յանձինս` Պուտաբեշտի Արքեպիսկոպոս` Կարտինալ Փիդէր Էրտոյի, եւ Սիւնհոդոսի յատուկ քարտուղարը յանձինս Իտալիոյ Գիեթի - Վասթօ թեմի Արքեպիսկոպոս` գերապայծառ Պրունօ Ֆորդէի։
Ֆրանչիսկոս Քահանայապետի գումարած առաջին սիւնհոդոսը տեղի կ՛ունենայ 5 – 19 հոկտեմբեր 2014 եւ նուիրուած է ''ընտանիքի հովուական մարտահրաւէրներուն''։