Papa në Engjëllin e Tënzot: të gjithë, bashkësi, shoqata e lëvizje, i përkasim Krishtit
Pas Meshës me kardinajtë e rinj, në mesditë, Papa kremtoi edhe lutjen tradicionale
të Engjëllit të Tënzot, nga dritarja e studios së tij private, në Pallatin Apostolik.
Përballë turmës së shtegtarëve, mbledhur në Sheshin e Shën Pjetrit, i nxiti gjithë
të krishterët të punojnë për unitetin e Kishës, duke e shmangur çdo ndarje, sepse
bashkësitë nuk i përkasin ndonjë predikatari, por vetë Krishtit.
Që në kohët
e Shën Palit, Kisha provoi rrezikun e ndarjeve: në bashkësinë e Korintit, vërejti
Papa duke komentuar Leximin e dytë të kësaj së diel, qenë formuar grupe, lidhur me
predikatarë të ndryshëm, të cilët konsideroheshin si krerë. Prej këndej, thoshin:
“Unë jam i Palit; unë, i Apolit; unë, i Çefës… (1,12). Shën Pali shpjegon se
kjo mënyrë të menduari është e gabuar, sepse bashkësia nuk u përket Apostujve. Përkundrazi,
janë Apostujt, që i përkasin bashkësisë, e bashkësia, e tëra, i përket Krishtit: “Nga
kjo përkatësi del se në bashkësitë e krishtera - dioqeza, famulli, shoqata, lëvizje
- ndryshimet nuk mund t’i kundërvihen faktit se të gjithë, nëpërmjet Pagëzimit, kemi
të njëjtin dinjitet: të gjithë, nëpër Jezu Krishtin, jemi bij të Hyjit. E ky është
dinjiteti ynë: në Jezu Krishtin jemi bij të Hyjit. Ata që kanë marrë detyrën e udhëheqësve,
të predikimit, të mbarështimit të Sakramenteve, nuk duhet ta mbajnë veten si zotërues
fuqish të veçanta, si padronë, por të vihen në shërbim të bashkësisë, duke e ndihmuar
të ecë me gëzim në udhën e shenjtërisë”. Kisha, vijoi Papa, ia beson kardinajve
të rinj dëshminë e këtij stili jete: “Koncistori i djeshëm dhe Kremtimi i
sotëm eukaristik na krijuan rastin e çmuar për të provuar katolicitetin, universalitetin
e Kishës, përfaqësuar më së miri nga prejardhja e larmishme e anëtarëve të Kolegjit
Kardinalor, shtrënguar në bashkim të ngushtë rreth Pasardhësit të Pjetrit. Zoti na
dhëntë hirin të punojmë për unitetin e Kishës, ta ndërtojmë këtë unitet, mbasi uniteti
është shumë më i rëndësishëm se ndeshjet. Uniteti i Kishës është në Krishtin, ndeshjet
janë probleme që jo gjithmonë janë në Krishtin”. Papa Françesku kërkoi,
më pas, të përtëritet feja, dashuria për Krishtin e për Kishën e Tij e të mbështeten
këta Barinj, duke i ndihmuar me lutje, për t’i prirë me zell gjithnjë më të madh popullit,
që u është besuar, e për t’u treguar të gjithëve dhimbsurinë dhe dashurinë e Zotit: “Sa
nevojë për lutje ka ipeshkvi, kardinali, papa, që të mund ta ndihmojë të ecë përpara
Popullin e Zotit. Them ‘ta ndihmojë’, domethënë, t’i shërbejë popullit të Zotit, sepse
thirrja e ipeshkvit, e kardinalit, e papës, është pikërisht kjo: të jetë shërbëtor,
të shërbejë në emër të Krishtit. Lutuni për ne, që të jemi shërbëtorë të mirë: shërbëtorë
të mirë, jo pronarë të mirë!”. Të gjithë së bashku, ipeshkvij, meshtarë,
rregulltarë e besimtarë shekullarë, shtoi Ati i Shenjtë, duhet të japim dëshminë e
një Kishe besnike ndaj Krishtit, të frymëzuar nga dëshira për t’u shërbyer vëllezërve
e të gatshëm për t’iu përgjigjur me guxim profetik, shpresave e kërkesave shpirtërore
të burrave e grave të kohës sonë. Zoja ju shoqëroftë e ju mbrojtë në këtë udhë.
Në
përfundim të Engjëllit të Tënzot, Papa i përshëndeti të gjithë shtegtarët e pranishëm,
ndërmjet të cilëve, venezuelanët, që banojnë në Itali e, posaçërisht, të gjithë shtegtarët
e ardhur me rastin e Koncistorit për t’i shoqëruar kardinajtë e rinj. Papa falënderoi
edhe vendet e shumta, që deshën të jenë të pranishme në këtë ngjarje të madhe, me
delegacione zyrtare.