Françesku: kardinali nuk hyn në një oborr mbretëror plot me intriga, por rrezaton
dashurinë e Krishtit në botë
“Gjuha jonë të jetë ajo e Ungjillit; sjelljet, të Lumnive e udha jonë, ajo e shenjtërisë”.
Këtë nënvizoi sot paradite Papa Françesku, gjatë kremtimit të Meshës në Bazilikën
e Shën Pjetrit, duke iu drejtuar 19 kardinajve të rinj, krijuar dje në Koncistor,
si dhe Kolegjit Kardinalor. Të gjithë Papa i porositi të rrinë larg dokeve e sjelljeve
të oborreve mbretërore, intrigave, thashethemeve, grupimeve e, të udhëhequr nga Shpirti
Shenjt, të bëhen ‘kanale, nëpër të cilat rrjedh dashuria e Krishtit”.
Përplot me stoli,
me lule e ngjyra, sot, Bazilika e Vatikanit: spikaste posaçërisht, ngjyra e gjelbër
e veshjeve të kremtuesve dhe ngjyra e kuqe si gjaku e kësulave të kardinajve, në
lutje, me Papën, që kryesoi Meshën Shenjte. Françesku e nisi homelinë, duke e marrë
shtytjen nga lutja drejtuar Atit qiellor, përmes Jezu Krishtit, propozuar këtë të
diel, e shtata e kohës së zakonshme gjatë vitit kishtar: “Ndihma jote, o Atë i mëshirshëm,
na jep hirin të jemi gjithnjë të vëmendshëm ndaj zërit të Shpirtit Shenjt”. Kjo lutje,
shqiptuar në krye të Meshës, tha Papa, na kujton detyrën themelore: “Dëgjimin
e Shpirtit Shenjt, që e gjallëron Kishën, i jep jetë. Me forcën e Tij krijuese e përtëritëse,
Shpirti Shenjt ngjall gjithnjë shpresa të reja në zemrën e popullit të Zotit, që vijon
shtegtimin në udhët e pafundme të historisë. E mbështet gjithnjë, si Paraklit, dëshminë
e të krishterëve”. Por, ç’porosi jepte Shpirti Shenjt nga tekstet e sotme
liturgjike? Papa i rikujtoi, duke nisur nga Libri i Levitikut, tek Ungjilli i Mateut
- tekstet e sotme, që të gjitha, ftesë për t’i përngjarë në shenjtëri e përsosuri
Atit tonë qiellor. Fjalë, që na bëjnë thirrje të gjithëve, tha Papa, duke iu drejtuar,
posaçërisht, kardinajve të rinj: “Të imitosh shenjtërinë e përsosurinë e
Zotit mund të duket cak i paarritshëm. Gjithsesi, Leximi i parë dhe Ungjilli na kujtojnë
shembuj konkretë, që sjellja e Zotit të bëhet rregull i mënyrës si veprojmë. Por
ne të gjithë duhet ta kujtojmë se pa Shpirtin Shenjt, çdo përpjekje e jona do të ishte
krejt e kotë. Shenjtëria e krishterë nuk është, në radhë të parë, vepra jonë, por
fryti i bindjes - së dëshiruar e të kultivuar - ndaj Shpirtit të Zotit, tri herë shenjt”. Është
Shpirti Shenjt, theksoi Papa, ai, që mund të na pastrojë, të na formojë, të na i
shndërrojë zemrat ditë për ditë, për të na bërë shenjtorë, sipas ligjit të ri, që
i kundërvihet plotësisht atij të urrejtjes, të hakmarrjes, të persekutimit. Njeriun,
që dëshiron ta ndjekë, kujtoi Ati i Shenjtë, Jezusi e porosit ta dojë atë, që nuk
e meriton, pa i kërkuar asgjë, për t’i mbushur me dashuri zemrat, marrëdhëniet njerëzore,
familjet, bashkësitë, botën: “Vëllezër kardinaj, Jezusi nuk erdhi të na mësojë
sjellje sallonesh. Për këtë nuk kishte nevojë të zbriste nga Qielli e të vdiste mbi
kryq. Krishti erdhi të na shpëtojë, të na tregojë rrugën, e vetmja rrugëdalje nga
rërat e lëvizshme të mëkatit. E kjo rrugë shenjtërie është mëshira. Ajo që Ai vetë,
i pari, e bëri e vijon ta bëjë ditë për ditë me ne. Të jesh shenjt nuk është luks,
është nevojë, për shëlbimin e botës”. E kjo u kërkohet nga Zoti e nga Kisha
Nënë edhe kardinajve: “Të jenë dëshmitarë të shenjtërisë me zell të zjarrtë, me gjithë
zemër”: “Prandaj t’i duam ata, që mbajnë qëndrim armiqësor ndaj nesh; t’i
bekojmë ata, që na marrin nëpër gojë kot; t’i përshëndesim me buzë në gaz ata, që
ndoshta as që e meritojnë; mos të lakmojmë dukjen, por t’i kundërvihemi prepotencës
me butësi e t’i harrojmë poshtërimet e pësuara”. Kardinajtë e udhëhequr
nga Shpirti i Krishtit, pohoi Papa, mund të jenë kanale, nëpër të cilat rrjedh dashuria
e krishterë. Kështu, theksoi në vijim, duhet të sillet kardinali: “Kardinali
hyn në Kishën e Romës, vëllezër, nuk hyn në një oborr mbretëror, prandaj duhen shmangur
doket e sjelljet e oborrit: intrigat, thashethemet, grupimet, favoritizmat, preferencat.
Gjuha jonë duhet të jetë ajo e Ungjillit: ‘po’, po’; ‘jo’,‘jo’; sjellja jonë duhet
të jetë ajo e Lumnive, udha, ajo e shenjtërisë”. Jeni tempull i Zotit,
përsëriti Papa fjalët e Shën Palit, tempull i shenjtë, në të cilin kremtohet liturgjia
e jetës, liturgji e dashurisë: “Kur në zemrën tonë gjen vend më i
vogli nga vëllezërit tanë, është Zoti vetë që e gjen këtë vend; kur ky vëlla lihet
përjashta, përjashta është vetë Zoti. Zemra pa dashuri është si kisha e çkishëruar,
që mund të shërbejë për gjithçka, përveç shërbimit hyjnor”. Në përfundim
Papa u kërkoi kardinajve afërsi me lutje e këshilla e, sidomos, bashkëpunim të ngushtë,
duke i porositur të kenë unitet të përkryer në lutjet drejtuar Shpirtit Shenjt, që
Kolegji të jetë plot me dashuri të krishterë e me shenjtëri, duke e ndihmuar
Kishën për të rrezatuar dritën e Krishtit në botën e sotme.