Իրան Եւ Բրիտանիա վերականգնած են դիւանագիտական յարաբերութիւնները
Ռուսական «Ինթըրֆաքս» լրատու գործակալութիւնը` յղում կատարելով իրանեան լրատուամիջոցներուն,
որոնք իրենց կարգին կը մէջբերեն Իրանի արտաքին գործոց փոխնախարարի խօսքը, կը հաղորդէ,
որ Թեհրան եւ Լոնտոն վերականգնած են իրենց դիւանագիտական յարաբերութիւնները գործերու
ժամանակաւոր հաւատարմատարներու մակարդակով: «Այս օրուընէ սկսեալ, Իրանը եւ Բրիտանիան
վերականգնած են դիւանագիտական յարաբերութիւնները գործերու ժամանակաւոր հաւատարմատարներու
մակարդակով, մնայուն կերպով չեն բնակիր երկու երկիրներու տարածքին մէջ», ընդգծած է դիւանագէտը: Ըստ
Իրանի արտաքին գործոց փոխնախարարին, Թեհրանի եւ Լոնտոնի մէջ դեսպանութիւններու ճակատին
բարձրացուած են երկու երկիրներու դրօշները: Բրիտանիոյ արտաքին գործոց նախարարութիւնը
հաստատած է, որ Իրանի հետ դիւանագիտական յարաբերութիւնները վերականգնուած են: Բրիտանիա
Թեհրանի մէջ իր դեսպանատունը փակած էր 2011-ին, երբ իրանցի ցուցարարներ յարձակում գործած
էին անոր վրայ: Թեհրանի մէջ Բրիտանիոյ դեսպանատան փակումէն ետք դադրեցուած էր նաեւ Լոնտոնի
մէջ Իրանի դեսպանատան աշխատանքը: