Вера, якая не выражаецца
ў справах – не з’яўляецца верай, перакананы папа Францішак. Падчас ранішняй Эўхарыстыі
ў Доме св. Марты 21 лютага 2014 г. Пантыфік адзначыў, што ў свеце існуе шмат хрысціян,
якія часта паўтараюць словы “Сімвала веры”, але не рэалізуюць іх на практыцы; маюць
тэалагічныя веды, якія, аднак, не адлюстроўваюцца ў іх жыцці. Асновай для гаміліі
Святога Айца сталі словы святога апостала Якуба, якія гучалі падчас Літургіі слова:
“вера мёртвая без учынкаў”. Паводле Францішка, можна ведаць усе запаведзі, прароцтвы,
усе праўды веры, але, калі яны не спаўняюцца на прыктыцы – непатрэбныя, бо з’яўляюцца
толькі тэорыяй. “Таксама і мы ў гэтым сэнсе часта памыляемся. Чуем, што нехта кажа:
“У мяне такая вялікая вера, веру ва ўсё, цалкам...” А можа асоба, якая кажа гэтыя
словы жыве летняй верай, дрэнна. Яе вера тэарэтычная, а не жывая ў яе жыцці”, - сказаў
Пантыфік.
На думку Папы, таксама і дэманы знаёмыя са зместам “Сімвала веры”
і ведаюць, Хто з’яўляецца Праўдай, але “верыць, не значыць ведаць”. Людзі, якія думалі
пра веру, як пра сістэму ідэй, успрымалі яе як ідэалогію, былі таксама і ў часы Езуса,
нагадаў Пантыфік. Іх адрозненне ад дэманаў, на думку Святога Айца, у тым, што апошнія
баяцца Бога, а першыя – “жывуць спакойна”. Евангелле прапануе таксама іншыя прыклады
асоб, якія не былі знаёмыя з навучаннем, але мелі вялікую веру: язычніца, якая прасіла
аздараўлення для сваёй дачкі, самаранка, якая адкрыта сэрца, сустрэўшы “не абстрактную
праўду”, а Езуса Хрыста, сляпы, які з пакорай укленчыў перад Панам.
Вера заўсёды
вядзе да сведчання. Вера – гэта сустрэча з Езусам Хрыстом, з Богам, і з яе нараджаецца
сведчанне. Менавіта аб гэтым, на думку Святога Айца, хацеў сказаць апостал Якуб: вера
без учынкаў, вера, якая цябе не ахоплівае, якая не спрыяе твайму сведчанню – гэта
не вера. Гэта толькі словы і нічога больш.