Папа адкрыў другі дзень кансісторыя малітвай за Украіну
Папа Францішак адкрыў
другі дзень надзвычайнага кансісторыя ў Ватыкане на тэму сям’і малітвай за Украіну,
пагружаную ў насілле. “Я хацеў бы прывітаць, і не толькі асабіста, але ад імя ўсіх,
украінскіх кардыналаў – кардынала Яворскага, арцыбіскупа Львова на пенсіі, і кардынала
Гузара, Вярхоўнага арцыбіскупа Кіева на пенсіі – якія ў гэтыя дні вельмі перажываюць
і маюць так шмат цяжкасцяў у сябе на Радзіме”, - сказаў Святы Айцец 21 лютага 2014
г. Кардыналы выказалі сваю згоду са словамі Папы і падтрымку ўкраінскім іерархам апладысментамі.
У апошні час Пантыфік неаднаразова заклікаў да мірнага вырашэння канфлікту ва Украіне.
У мінулую сераду на заканчэнне агульнай аўдыенцыі ён запэўніў у сваёй блізкасці да
ўкраінскага народа і заклікаў усе бакі спыніць любыя акты насілля і шукаць згоды і
міру. “Я спадзяюся, што дойдзе да канструктыўнага дыялогу паміж дзяржаўнымі ўстановамі
і грамадзянскай супольнасцю”, - сказаў Францішак 26 студзеня 2014 г. падчас сустрэчы
з вернікамі на малітве “Анёл Панскі”.
Адкрываючы сённяшняе пасяджэнне, Пантыфік
прызнаўся, што “учора, перад сном” перачытаў уступны даклад кардынала Каспера, і хацеў
бы падзякаваць іерарху за “глыбокую тэалогію” і “ясную тэалагічную думку”. Папа сказаў,
што ў думках кардынала Каспера ён знайшоў “sensus ecclesiae” і любоў да Маці-Касцёла.
Святы Айцец прызнаўся, што для яго гэта прыклад тэалогіі, якая здзяйсняецца на каленях.