Deklaratë e drejtorit të Sallës së Shtypit të Selisë së Shenjtë, në emër të Koncistorit
të jashtëzakonshëm të kardinjave
Më pas, gjatë konferencës për shtyp të zëdhënësit të Vatikanit, atë Federiko Lombardi,
u vu sërish në dukje shqetësimi i kardinajve për gjendjen në Ukrainë. Kardinali Anxhelo
Sodano, në emër të Koncistorit dhe të Papës, u dërgoi një mesazh solidariteti kardinajve
ukrainas. Po shqetësimet nuk përfundojnë me ish-vendin sovjetik. Në një deklaratë
të veçantë, miratuar nga kardinajtë dhe nga Papa Françesku personalisht, shprehet
kujdesi e vëmendja për gjendjen e të krishterëve të persekutuar në botë, por edhe
për konfliktet në vende të tjera, sidomos në Republikën Qendroafrikane. Është deklaratë
e drejtorit të Sallës së Shtypit, sqaroi atë Lombardi, por paraqet mendimin, qëndrimin,
ndjenjat e Papës, së bashku me ato të Koncistorit. Ta dëgjojmë: “Gjatë Koncistorit
të jashtëzakonshëm, Ati i Shenjtë dhe Kolegji Kardinalor i lartuan Zotit një lutje
të veçantë për të krishterët e shumtë, që, në shumë anë të botës, janë gjithnjë e
më shpesh viktima të akteve të intolerancës, ose të persekutimit. Ati i Shenjtë dhe
kardinajtë dëshirojnë t’i sigurojnë ata, që vuajnë për shkak të Ungjillit, se luten
vazhdimisht për ta. Gjithashtu, u bëjnë thirrje të qëndrojnë të fortë në fe e t’i
falin nga zemra persekutuesit, duke imituar Zotin Jezus. Njëkohësisht,
mendimi i Papës dhe i kardinajve shkoi edhe tek kombet, që në këtë çast, po vuajnë
nga konfliktet e brendshme, ose nga tensione të rënda, që lëndojnë bashkëjetesën normale
civile, si në Sudanin e Jugut apo në Nigeri, kunjë rrjedhë e vazhdueshme atentatesh
shkakton shumë viktima të pafajshme, në një atmosferë indiference në rritje. Këtyre
orëve, zgjojnë shqetësime të veçanta, zhvillimet dramatike të gjendjes në Ukrainë,
për të cilën urojmë të ndalet menjëherë çdo veprim i dhunshëm e të rivendosen pajtimi
e paqja. Në të njëjtën mënyrë, shqetëson jashtëzakonisht vazhdimi i konfiliktit
në Siri, që duket larg gjetjes së një zgjidhjeje paqësore afatgjatë, ashtu siç shqetëson
edhe konflikti në Republikën Qendroafrikane, i cili merr çdo ditë përmasa më të mëdha.
Ndjehet gjithnjë e më shumë urgjenca e një nisme të bashkësisë ndërkombëtare për të
favorizuar paqen dhe pajtimin e brendshëm, për të garantuar rivendosjen e sigurisë
e të shtetit të së drejtës e për të mundësuar hyrjen e domosdoshme të ndihmave humanitare.
Fatkeqësisht, [kardinajtë] vërejnë se shumë nga konfliktet aktuale përshkruhen
si fetare - jo rrallë, duke i nxitur fshehurazi të krishterët e myslimanët njëri kundër
tjetrit - ndërsa kemi të bëjmë me konflikte me natyrë kryesisht etnike, politike,
ose ekonomike. Nga ana e saj, Kisha Katolike, duke dënuar çdo dhunë të ushtruar në
emër të përkatësisë fetare, do të vazhdojë impenjimin e saj për paqen e pajtimin,
përmes dialogut ndërfetar dhe veprave të shumta të bamirësisë, që çdo ditë, u japin
ndihmë e ngushëllim nevojtarëve kudo në botë”. Atë Federiko Lombardi foli
më pas për tematikat e diskutuara këtyre ditëve. Dha lajmin e emërimit të tre presidentëve
të Sinodit për Familjen, që do të jenë: kryeipeshkvi i Parisit, kardinali Vingt-Trois;
kryeipeshkvi i Manilës, kardinali Tagle dhe kryeipeshkvi i Aparesidës, kardinali Damasceno
Assis. Tashmë, komentoi zëdhënësi vatikanas, ekipi që do të udhëheqë Sinodin është
i plotë. Në diskutimet
e tyre, mëse 50 kardinaj vunë në dukje gjendjen e vështirë të familjes së krishterë,
në një shoqëri të shekullarizuar, por edhe vështirësitë e Kishës Katolike për të gjetur
zgjidhje të qëndrueshme. Atë Lombardi vuri në dukje se kardinajtë përmendën dokumentet
kryesore të doktrinës së krishterë, por edhe – e kjo mund të jetë pikë interesante
referimi për të ardhmen – “teologjinë e trupit” të të Lumit Gjon Pali II, i cili pati
paraqitur magjisterin e tij mbi dashurinë e seksualitetin në katekizmin e audiencës
së përgjithshme të së mërkurës, nga viti 1979 deri në vitin 1984. Të rëndësishme,
sipas atë Lombardit, diskutimet mbi gjendjen e të divorcuarve të rimartuar dhe pranimin
e tyre në Sakramente: “Për këtë, pati një sërë ndërhyrjesh shumë të rëndësishme,
mjaft të zgjeruara e të qeta. Besoj se qe një reflektim i kënaqshëm për të gjithë
pjesëmarrësit, por nuk u mor asnjë vendim e nuk pati asnjë prononcim për ndonjë orientim
të veçantë, përveç impenjimit për të arritur në ndërthurjen sa më të mirë të temës
së besnikërisë ndaj Fjalës së Zotit me temën e mëshirës e të dashurisë në jetën e
Kishës. Kardinajtë treguan ndjeshmëri të madhe e kujdes ndaj të gjitha aspekteve,
që duhen marrë parasysh”.